واٹس ایپ بزنس استعمال کرنے والوں کیلئے میٹا نے نیا بلنگ سسٹم متعارف کروادیا

میٹا نے اپنے واٹس ایپ بزنس پلیٹ فارم کے لیے نئے قیمتوں کے نظام کا اعلان کر دیا ہے۔

 کمپنی کے مطابق یکم اگست 2026 سے کاروباری صارفین کے لیے بلنگ کا طریقہ تبدیل کر دیا جائے گا۔ اب وہ ادارے جو میٹا بزنس ایجنٹ کے ذریعے مصنوعی ذہانت پر مبنی سہولیات استعمال کرتے ہیں، ان سے فی پیغام فیس لینے کے بجائے ٹوکن بیسڈ سسٹم کے تحت ادائیگی وصول کی جائے گی۔

میٹا کا کہنا ہے کہ نئے نظام میں کاروباری ادارے ہر پیغام پر ایک مقررہ رقم ادا نہیں کریں گے۔ اس کے بجائے فیس اس بنیاد پر وصول کی جائے گی کہ مصنوعی ذہانت صارف کے سوال یا درخواست کو سمجھنے اور اس کا جواب تیار کرنے کے لیے کتنے ٹوکن استعمال کرتی ہے۔

کمپنی نے مزید بتایا کہ آج کل واٹس ایپ بزنس پر اے آئی کسٹمر سپورٹ، سیلز اور دیگر کاروباری خدمات میں اہم کردار ادا کر رہی ہے۔ اسی وجہ سے روایتی بلنگ سسٹم کی جگہ ایسا ماڈل لایا جا رہا ہے جو اے آئی کی حقیقی لاگت کو بہتر انداز میں ظاہر کرے۔

اعلان کے مطابق یکم اکتوبر 2026 سے بعض کاروباری پیغامات پر دوبارہ فیس بھی وصول کی جائے گی۔ یہ وہ چارجز ہیں جنہیں تقریباً دو سال قبل عارضی طور پر ختم کر دیا گیا تھا۔

میٹا کے اندازے کے مطابق ایک عام صارف کے ساتھ ہونے والی گفتگو میں تقریباً 20 ہزار سے 25 ہزار ٹوکن استعمال ہوتے ہیں۔ اس حساب سے ایک گفتگو کی لاگت تقریباً 4 سے 5 امریکی سینٹ بنتی ہے۔ کمپنی نے واضح کیا کہ میٹا بزنس ایجنٹ کے لیے ٹوکن کی قیمت دنیا بھر میں یکساں ہوگی، جبکہ اس میں اے آئی پروسیسنگ اور پیغام کی ترسیل دونوں شامل ہوں گے۔

رپورٹس کے مطابق میٹا کا نیا ماڈل مصنوعی ذہانت کی معروف کمپنیوں کے انٹرپرائز بلنگ سسٹم سے ملتا جلتا ہے۔ کمپنی مستقبل میں واٹس ایپ بزنس کو صرف میسجنگ پلیٹ فارم کے بجائے مکمل اے آئی پر مبنی کاروباری پلیٹ فارم بنانا چاہتی ہے، جہاں صارفین کی رہنمائی، اپائنٹمنٹ بکنگ، سیلز اور کسٹمر سپورٹ جیسے کئی کام خودکار انداز میں انجام دیے جا سکیں۔

میٹا نے یہ بھی بتایا کہ چھوٹے کاروبار مخصوص واٹس ایپ بزنس پریمیم سبسکرپشن کے ذریعے یہ سہولت حاصل کر سکیں گے، جبکہ بڑے اداروں سے صرف استعمال ہونے والے ٹوکنز کے مطابق فیس وصول کی جائے گی۔