واٹس ایپ نے آئی پیڈ صارفین کے لیے 4 نئے فیچرز متعارف کرا دیے

واٹس ایپ نے آئی پیڈ صارفین کے لیے اہم اپ ڈیٹ جاری کرتے ہوئے چار نئے فیچرز متعارف کرا دیے ہیں، جن سے آئی پیڈ پر ایپ کا استعمال مزید آسان اور بہتر ہو جائے گا۔

نئے فیچرز میں سب سے اہم سہولت یہ ہے کہ اب آئی پیڈ صارفین کسی موبائل فون سے اکاؤنٹ لنک کیے بغیر براہِ راست واٹس ایپ استعمال کر سکیں گے۔

اس سے قبل آئی پیڈ پر واٹس ایپ استعمال کرنے کے لیے صارفین کو اپنے اکاؤنٹ کو کسی اسمارٹ فون سے لنک کرنا پڑتا تھا، تاہم نئی اپ ڈیٹ کے بعد صارفین آئی پیڈ پر ہی اپنا واٹس ایپ اکاؤنٹ رجسٹر، سیٹ اپ اور استعمال کر سکیں گے۔

یہ تبدیلی گزشتہ سال متعارف کرائی گئی آئی پیڈ ایپ کو مزید فعال بنانے کی جانب اہم پیش رفت قرار دی جا رہی ہے۔

گاڑیوں کے سسٹمز کے ساتھ بہتر مطابقت

واٹس ایپ نے گاڑیوں کے انفوٹینمنٹ سسٹمز کے ساتھ بھی اپنی مطابقت بہتر بنا دی ہے۔ اب ایپل کار پلے اور اینڈرائیڈ آٹو کے ذریعے آنے والے پیغامات بلند آواز میں سنے جا سکیں گے جبکہ صارفین ہاتھ استعمال کیے بغیر صوتی جواب بھی بھیج سکیں گے۔

ڈرائیورز گاڑی کی اسکرین سے براہ راست فون کال کر سکیں گے، کال ہسٹری دیکھ سکیں گے اور پسندیدہ رابطوں تک رسائی حاصل کر سکیں گے۔

پی ڈی ایف فائلز کے لیے نئی سہولت

نئی اپ ڈیٹ کے تحت صارفین اب واٹس ایپ کے اندر پی ڈی ایف فائلز کو پہلے ڈاؤن لوڈ کیے بغیر فوری طور پر کھول سکیں گے۔

اس کے علاوہ ایپ کے اندر ہی بنیادی ترمیمات جیسے نوٹس لکھنا اور اہم متن کو ہائی لائٹ کرنے کی سہولت بھی فراہم کی گئی ہے۔

موسیقی کو واٹس ایپ اسٹیٹس پر شیئر کرنے کا آپشن

واٹس ایپ نے اسپاٹیفائی اور ایپل میوزک صارفین کے لیے بھی نئی سہولت متعارف کرائی ہے۔ اب ان میوزک اسٹریمنگ پلیٹ فارمز کے شیئر آپشن کے ذریعے چلنے والا گانا براہ راست واٹس ایپ اسٹیٹس پر شیئر کیا جا سکے گا۔

میٹا کے مطابق یہ تمام نئی سہولتیں دنیا بھر کے واٹس ایپ صارفین کے لیے مرحلہ وار جاری کی جا رہی ہیں، تاکہ صارفین کو مزید بہتر اور جدید تجربہ فراہم کیا جا سکے۔