اسمارٹ فون کو اسکرین پروٹیکٹر کے بغیر کیسے محفوظ رکھیں؟ یہ طریقے آزمائیں

اگر آپ نے حال ہی میں کوئی فلیگ شپ اسمارٹ فون خریدا ہے تو ممکن ہے کہ آپ کو اس کی اسکرین کے لیے اضافی پروٹیکٹر کی ضرورت محسوس نہ ہو۔ جدید اسمارٹ فونز میں مضبوط اسکرین گلاس استعمال کیا جاتا ہے جو روزمرہ استعمال کے دوران خراشوں سے کافی حد تک تحفظ فراہم کرتا ہے۔

اس کے باوجود بہت سے لوگ فون کی اسکرین کو مزید محفوظ رکھنے کے لیے اسکرین پروٹیکٹر استعمال کرتے ہیں۔ یہ خاص طور پر فون کے گرنے یا کسی سخت چیز سے ٹکرانے کی صورت میں اسکرین کو اضافی تحفظ دے سکتا ہے۔

اسکرین پروٹیکٹر خراشوں کے خلاف کافی مزاحمت رکھتے ہیں، لیکن انہیں مکمل طور پر اسکریچ پروف نہیں کہا جاسکتا۔

فون کو اسکرین کے بل کسی سخت سطح پر رکھنے سے پروٹیکٹر پر خراشیں پڑ سکتی ہیں۔ اسی طرح جیب یا بیگ میں چابیاں، سکے اور دیگر سخت اشیا رکھنے سے بھی اس کی سطح متاثر ہوسکتی ہے۔

مٹی اور گرد کے ذرات بھی وقت کے ساتھ اسکرین پروٹیکٹر پر معمولی خراشوں کا سبب بن سکتے ہیں، خاص طور پر اس وقت جب فون کو صاف کیے بغیر بار بار استعمال کیا جائے۔

اگر پروٹیکٹر پر صرف معمولی خراشیں ہیں اور ٹچ اسکرین ٹھیک کام کررہی ہے تو اسے فوری طور پر تبدیل کرنا ضروری نہیں۔

تاہم اگر پروٹیکٹر ٹوٹ گیا ہو، اس کے کنارے اٹھنے لگے ہوں، اس میں گہری دراڑیں پڑ گئی ہوں یا ٹچ کے استعمال میں رکاوٹ پیدا ہورہی ہو تو اسے تبدیل کرنا بہتر ہے۔

اگر آپ نیا پروٹیکٹر لگوانا نہیں چاہتے تو فون کی اصل اسکرین کو صاف رکھنا ضروری ہے۔ اس کے لیے نرم اور صاف مائیکرو فائبر کپڑا استعمال کریں اور گرد و غبار کو باقاعدگی سے صاف کرتے رہیں۔

صفائی کے لیے فون بنانے والی کمپنی کی ہدایات پر عمل کریں اور کسی بھی نامعلوم یا غیر موزوں کیمیکل کو براہ راست اسکرین پر استعمال کرنے سے گریز کریں۔

یاد رکھیں کہ جدید اسمارٹ فونز کی اسکرین مضبوط ضرور ہوتی ہے، لیکن مکمل طور پر خراشوں یا ٹوٹنے سے محفوظ نہیں۔ اس لیے فون کو چابیاں، سکے اور دیگر سخت اشیا کے ساتھ رکھنے سے گریز کرنا بہتر ہے۔