مصر کے ہائی وے پر خوفناک حادثہ، 32 افراد ہلاک، 60 زخمی

قاہرہ: مصر کے ہائی وے پر خوفناک حادثے کے نتیجے میں 32 افراد ہلاک اور متعدد زخمی ہو گئے۔

غیر ملکی میڈیا کے مطابق یہ حادثہ ہفتے کے روز مصر کے گورنریٹ بہیرا کے ہائی وے پر پیش آیا۔

انتظامیہ کا کہنا ہے کہ ایک مسافر بس مصر کے دارالحکومت قاہرہ کی جانب رواں دواں تھی کہ صبح کے وقت شدید دھند کے باعث ہائی پر کھڑی ایک گاڑی سے ٹکرا گئی جس کے بعد دیکھتے دیکھتے دیگر گاڑیاں بھی پہلے بس اور پھر ایک دوسرے میں جاگھسیں۔

یہ بھی پڑھیں: کویت میں خوفناک ٹریفک حادثہ ،معروف پاکستانی جاں بحق

رپورٹس کے مطابق تصادم میں 29 گاڑیوں کو نقصان پہنچا جبکہ ایک بس سمیت 6 گاڑیوں میں آگ بھڑک اٹھی جس کی وجہ سے نقصان زیادہ ہوا۔

مصر کی وزارت صحت کا کہنا ہے کہ حادثے کے نتیجے میں 32 افراد ہلاک اور 60 افراد زخمی ہوئے جنہیں اسپتال منتقل کر دیا گیا ہے۔