اسرائیل کی غزہ پر بمباری جاری، مزید 35 فلسطینی شہید، 90 گرفتار

غزہ: اسرائیلی فوج کی غزہ پر بمباری کا سلسلہ جاری ہے، مزید 35 فلسطینیوں کو اسرائیلی فوج نے شہید کردیا۔

گزشتہ رات جبالیہ، خان یونس اور رفح سمیت کئی علاقوں پر فضائی حملے کیے گئے اور چند گھنٹوں میں مزید 35 فلسطینیوں کو شہید کردیا گیا۔

صہیونی فوج نے غزہ کے چرچ پر بھی فائرنگ کی جس کے نتیجے میں مسیحی ماں اور بیٹی مارے گئے۔

شمالی غزہ میں بمباری سے مزید دو گھر تباہ ہوئے چودہ افراد شہید ہوگئے۔

سات اکتوبر سے اب تک 19 ہزار فلسطینی شہید ہو چکے ہیں۔

اسرائیلی فورسز نے کمال عدوان اسپتال پر پھر دھاوا بولا اور عرب میڈیا کے مطابق 90 افراد کو گرفتار کرلیا۔

یہ بھی پڑھیں: اسرائیلی فوج کا خوف، اسرائیلی فوج نے غزہ میں اپنے 3 شہری مار دیے

اسرائیلی اسنائپرز نے فائرنگ کرکے ایک اور فلسطینی صحافی کو شہید کردیا۔

دوسری جانب حماس کی جانب سے اسرائیلی فورسز پر راکٹوں، مارٹر گولوں اور اسنائپر رائفل سے حملے کیے گئے، جس کے نتیجے میں اسرائیلی متعدد فوجی ہلاک ہوئے۔

القسام بریگیڈز نے حملوں کی ویڈیو جاری کی اور اسرائیلی فوج کی ایم 16 رائفل اور دیگر سامان قبضے میں لے لیا۔