میانمار میں زلزلے سے ہلاکتوں کی تعداد 2700 سے تجاوز کر گئی

اقوام متحدہ کے دفتر برائے رابطہ برائے انسانی امور (او سی ایچ اے) نے کہا ہے کہ میانمار میں زلزلے کے بعد پناہ گاہ، صاف پانی اور ادویات کی قلت ہے۔

جمعے کے روز 7.7 شدت کے زلزلے کے نتیجے میں 2700 سے زائد افراد ہلاک اور 4500 سے زائد زخمی ہوئے جبکہ اہم پلوں اور سڑکوں سمیت بنیادی ڈھانچے کو شدید نقصان پہنچا ہے۔

اقوام متحدہ کے متعدد اداروں نے پینے کے پانی کی قلت کے بارے میں تشویش کا اظہار کیا ہے اور ہیضے کے پھیلنے کے خدشات کا اظہار کیا۔

ورلڈ ہیلتھ آرگنائزیشن کا کہنا ہے کہ اسپتال بھر گئے ہیں اور طبی سامان ختم ہو رہا ہے اور پانی اور ایندھن کی قلت ہے۔

اقوام متحدہ کے ادارہ برائے مہاجرین یو این ایچ سی آر نے اس صورت حال کی نشاندہی اعلیٰ سطح کے انسانی بحران کے طور پر کی اور وہ پلاسٹک کی چادریں، سونے کا سامان اور مچھر دانیوں جیسے ذخیرے جمع کر رہا ہے۔

تنظیم کے مطابق سڑکوں اور پلوں کو شدید نقصان پہنچنے کی وجہ سے امدادی کارروائیاں پیچیدہ ہو گئی ہیں، جس کا مطلب ہے کہ یو این ایچ سی آر کی ٹیموں کو ینگون سے منڈلے پہنچنے میں 13 گھنٹے لگے، جو عام طور پر آٹھ گھنٹے کا سفر ہونا چاہیے۔

او سی ایچ اے، یو این ایچ سی آر اور یونیسیف نے فنڈنگ کے خدشات کا اظہار کرتے ہوئے ممالک پر زور دیا ہے کہ وہ رقم کی پیش کش کریں تاکہ وہ اسٹاک کو دوبارہ بھر سکیں۔

میانمار 2021 کے اوائل سے بدامنی کا شکار ہے، جب فوج نے نوبل امن انعام یافتہ آنگ سان سوچی کی سربراہی میں ایک منتخب سویلین حکومت کا تختہ الٹ دیا تھا۔

ایک احتجاجی تحریک جنتا کے خلاف مسلح بغاوت میں بدل گئی اور بڑھتے ہوئے تنازعے نے 3.5 ملین سے زیادہ افراد کو بے گھر کر دیا۔