امریکہ اور ایران جنگ ختم کرنے کے قریب، پاکستان کے ذریعے پیغامات کا تبادلہ تیز

ایران اور امریکہ کے درمیان ایک صفحے پر مشتمل مفاہمتی یادداشت پر اتفاق رائے کے قریب پہنچنے کی اطلاعات موصول ہوئی ہیں، جس میں پاکستان کا کلیدی کردار سامنے آیا ہے۔

ایران اور امریکہ کے درمیان جاری طویل جنگ اور سفارتی تعطل کے خاتمے کے لیے ایک انتہائی اہم اور حوصلہ افزا پیش رفت سامنے آئی ہے۔

تازہ ترین اطلاعات کے مطابق دونوں ممالک ایک ایسے ایک صفحے پر مشتمل مفاہمتی یادداشت پر دستخط کرنے کے قریب پہنچ چکے ہیں، جس کا بنیادی مقصد خلیج میں جاری فوری جنگ کو ختم کرنا ہے۔

برطانوی خبر رساں ادارے روئٹرز اور دیگر بین الاقوامی ذرائع کے مطابق ایران کی وزارت خارجہ نے اس بات کی تصدیق کی ہے کہ وہ امریکہ کی جانب سے دی گئی نئی تجاویز کا باریک بینی سے جائزہ لے رہے ہیں اور اس کا باضابطہ جواب بہت جلد پاکستان کے ذریعے واشنگٹن تک پہنچا دیا جائے گا۔

پاکستان نے اس پورے بحران میں ایک انتہائی اہم اور مرکزی ثالث کا کردار ادا کیا ہے۔ اسلام آباد نے نہ صرف مذاکرات کے ایک دور کی میزبانی کی ہے بلکہ اب بھی دونوں ممالک کے درمیان پیغامات کی ترسیل کا سب سے بڑا ذریعہ بنا ہوا ہے۔

یہ بھی پڑھیں : امریکہ ایران تنازع میں چین کی انٹری، بیجنگ نے باضابطہ ثالثی کی پیشکش کر دی

امریکی صدر ڈونلڈ ٹرمپ نے وائٹ ہاؤس میں ایک تقریب کے دوران اس بات کی تصدیق کی کہ ایران اب سنجیدگی سے مذاکرات کرنا چاہتا ہے اور امریکہ ایسے لوگوں سے بات چیت کر رہا ہے، جو حقیقت میں ایک قابل قبول معاہدہ کرنے کے خواہشمند ہیں۔

ذرائع کا کہنا ہے کہ مجوزہ مفاہمتی یادداشت چودہ نکات پر مشتمل ہے، جس کے تحت سب سے پہلے جنگ کا باضابطہ خاتمہ کیا جائے گا اور اس کے فوری بعد آبنائے ہرمز سے جہاز رانی کی بحالی پر کام شروع ہوگا۔

اس معاہدے کی خاص بات یہ ہے کہ اس میں ایران پر عائد امریکی پابندیوں کے خاتمے کا ذکر تو ہے، تاہم ایران کے جوہری پروگرام جیسے انتہائی پیچیدہ اور متنازع معاملات کو بعد کے مذاکرات کے لیے چھوڑ دیا گیا ہے۔

دوسری جانب اسرائیل کے وزیراعظم بنیامین نیتن یاہو نے اس صورتحال پر اپنے تحفظات کا اظہار کرتے ہوئے کہا ہے کہ وہ اس معاملے پر صدر ٹرمپ سے رابطے میں ہیں۔

اسرائیل کا مطالبہ ہے کہ ایران سے تمام افزودہ یورینیم ہٹا دیا جائے تاکہ وہ مستقبل میں ایٹمی ہتھیار تیار نہ کر سکے۔ تاہم ایران نے ایک بار پھر واضح کیا ہے کہ اس کا ایٹمی پروگرام خالصتاً پرامن مقاصد کے لیے ہے اور وہ ایٹمی ہتھیار حاصل کرنے کا کوئی ارادہ نہیں رکھتا۔