آبنائے ہرمز سے بارودی سرنگیں ہٹانے کے عمل میں بیرونی مداخلت برداشت نہیں کریں گے، ایران

ایران نے آبنائے ہرمز میں بارودی سرنگیں ہٹانے کے آپریشن میں کسی بھی بیرونی ملک کی شمولیت کو مسترد کرتے ہوئے واضح کیا ہے کہ یہ کام صرف تہران کی جانب سے کیا جائے گا۔

ایران نے اس بات کا سختی سے اعلان کیا ہے کہ وہ آبنائے ہرمز جیسی اہم اسٹریٹجک آبی گزرگاہ سے بارودی سرنگیں صاف کرنے کے آپریشن میں کسی بھی بیرونی یا غیر ملکی ملک کی شراکت داری کو قبول نہیں کرے گا۔

ایران کے نائب وزیر خارجہ کاظم غریب آبادی نے واضح الفاظ میں کہا کہ ان کا ملک کسی بھی بیرونی عنصر کو اس حساس اور اہم آبی راستے سے بارودی سرنگیں ہٹانے کے عمل میں حصہ لینے کی اجازت نہیں دے گا۔

یہ بھی پڑھیں : ایران کو قطر سے 6 ارب ڈالر کی رقم جلد مل جائے گی، مسعود پزشکیان

ان کا کہنا تھا کہ ایران موجودہ مفاہمت کی یادداشت کے تحت آبنائے ہرمز سے بارودی سرنگیں ہٹانے کا عمل تنہا سرانجام دے گا، اور تہران اصولی طور پر اس بات کے حق میں نہیں ہے کہ کوئی دوسرا ملک اس معاملے میں مداخلت کرے۔

کاظم غریب آبادی نے آبنائے ہرمز کی موجودہ صورتحال کو انتہائی حساس اور پیچیدہ قرار دیا، اور ساتھ ہی فرانس کو خبردار کیا کہ وہ اشتعال انگیز بیانات سے معاملات کو مزید الجھانے سے گریز کرے۔

یہ ایرانی ردعمل فرانسیسی صدر ایمانوئل میکرون کے اس بیان کے بعد سامنے آیا ہے، جس میں انہوں نے آبنائے ہرمز میں بحری جہازوں کی آمد و رفت کو محفوظ بنانے کے لیے عمان کے ساتھ تعاون کا اعلان کیا تھا۔

فرانسیسی صدر نے کہا تھا کہ فرانس اور عمان اپنے شراکت داروں کے ساتھ مل کر اس عالمی تجارتی راستے سے بارودی سرنگیں ہٹانے پر متفق ہوئے ہیں تاکہ خطے میں کشیدگی کو کم کیا جا سکے۔