امریکہ کے ایران پر مسلسل تیسری رات شدید فضائی حملے، متعدد شہروں اور بندرگاہوں پر بمباری

امریکی فورسز نے مسلسل تیسری رات ایران کے مختلف شہروں اور بندرگاہوں پر شدید فضائی اور میزائل حملے کیے، جس کے نتیجے میں متعدد شہادتیں رپورٹ ہوئیں۔

امریکی سینٹرل کمانڈ نے صدر ڈونلڈ ٹرمپ کے احکامات پر مسلسل تیسری رات ایران پر شدید بمباری کی ہے تاکہ آبنائے ہرمز میں تجارتی جہازوں کو نشانہ بنانے کی ایرانی صلاحیت کو ختم کیا جا سکے۔

ان تازہ حملوں کے دوران جنوبی ایران کے شہر بندر عباس اور کیش جزیرے پر شدید دھماکے سنے گئے، جہاں مسافر پورٹ پر کھڑے 3 بحری جہازوں میں آگ بھڑک اٹھی۔

یہ بھی پڑھیں : ایرانی فوجی کی خطے کے ممالک کو امریکی اتحاد میں شامل ہونے پر وارننگ

ایرانی میڈیا کے مطابق امریکی حملوں میں خوزستان صوبے کے شہر امیدیہ میں 4 افراد زخمی ہوئے جبکہ بسہر، قشم، ابو موسیٰ، کنارک اور چابہار کی بندرگاہوں کو بھی نشانہ بنایا گیا۔

امریکی حملوں کے دوران خلیج فارس میں امریکا کے ایندھن بھرنے والے اور جدید جاسوس طیارے فضا میں پرواز کرتے دیکھے گئے۔

ادھر ایرانی پاسدارانِ انقلاب نے تصدیق کی ہے کہ خوزستان کے شہر عبادان میں 3 مقامات پر امریکی حملوں کے نتیجے میں ان کے 3 اہلکار شہید ہو گئے ہیں جبکہ مقامی حکام کے مطابق ان حملوں میں 2 عام شہری بھی جاں بحق اور 3 زخمی ہوئے ہیں۔