ایرانی فوج کا شمالی بحرِ ہند میں امریکی بحری جہاز پر کروز میزائل سے حملہ

ایرانی فوج نے شمالی بحرِ ہند میں ایک امریکی بحری جہاز کو ساحل سے داغے گئے کروز میزائل سے نشانہ بنایا، جس کے بعد امریکی بحری جہاز ایرانی بحریہ کے آپریشنل دائرے سے پیچھے  ہٹ گیا۔

ایرانی میڈیا کے مطابق ساحلی علاقے سے فائر کیے گئے کروز میزائل نے بحرِ ہند میں موجود امریکی بحری جہاز کو نشانہ بنایا، جس کے نتیجے میں امریکی جہاز ایرانی بحریہ کے یونٹ کی رینج سے باہر جانے پر مجبور ہوگیا۔

دوسری جانب پاسدارانِ انقلاب نے آبنائے ہرمز میں ایک آئل ٹینکر کو ڈرونز سے نشانہ بنانے کی ویڈیو بھی جاری کی ہے۔

ایرانی حکام کے مطابق متعلقہ ٹینکر نے آبنائے ہرمز میں ایرانی حکام کی ہدایات پر عمل نہیں کیا تھا، جس کے بعد اس کے خلاف کارروائی کی گئی۔

یہ کارروائیاں ایسے وقت میں سامنے آئی ہیں جب امریکہ کی جانب سے مسلسل ساتویں رات بھی ایران پر حملے کیے گئے۔

ایرانی فوج نے کہا ہے کہ اگر امریکی حملے جاری رہے تو ایران بھرپور جوابی کارروائی کرے گا۔