کاکروچ جنتا پارٹی کے احتجاج میں کشمیری رکن پارلیمنٹ کا دفعہ 370 کی بحالی کا مطالبہ

مقبوضہ جموں و کشمیر سے رکن پارلیمنٹ آغا سید روح اللہ مہدی نے نئی دہلی میں کاکروچ جنتا پارٹی کے احتجاج میں شرکت کے دوران دفعہ 370 کی بحالی کا پرزور مطالبہ کیا۔

بھارتی غیر قانونی طور پر مقبوضہ جموں و کشمیر سے تعلق رکھنے والے رکن پارلیمنٹ آغا سید روح اللہ مہدی نے نئی دہلی میں ایک بڑے احتجاج سے خطاب کرتے ہوئے دفعہ 370 کی فوری بحالی کا مطالبہ کیا ہے۔

ان کا کہنا ہے کہ مقبوضہ جموں و کشمیر کی ریاستی حیثیت کی بحالی آئینی شقوں کی واپسی سے الگ نہیں کی جا سکتی۔ کشمیر میڈیا سروس کے مطابق سرینگر سے نیشنل کانفرنس کے رکن پارلیمنٹ نے یہ باتیں نئی دہلی کے تاریخی مقام جنتر منتر پر کاکروچ جنتا پارٹی کے زیراہتمام منعقدہ مظاہرے سے خطاب کرتے ہوئے کہیں۔

اجتماع سے خطاب میں آغا سید روح اللہ مہدی نے کہا کہ جموں و کشمیر کے لوگوں کے آئینی حقوق اور شناخت کی بحالی ناگزیر ہے۔

یہ بھی پڑھیں : بھارت میں طلباء کے احتجاج میں شدت، کاکروچ جنتا پارٹی کا وزیراعظم کے استعفے کا مطالبہ

انہوں نے اس بات پر زور دیا کہ انصاف کی کوئی بھی جدوجہد دفعہ 370 کی بحالی کے بغیر نامکمل رہے گی، جسے بھارتی حکومت نے 5 اگست 2019 کو منسوخ کر دیا تھا۔

انہوں نے مظاہرین پر زور دیا کہ وہ آئینی اور سیاسی حقوق کے لیے اپنی پرامن جمہوری جدوجہد جاری رکھیں کیونکہ ایک جمہوری نظام میں عوام کی آواز سننا فرض ہے۔

رکن پارلیمنٹ نے احتجاج میں شریک طلباء کے تحفظات کا مقبوضہ جموں و کشمیر کی صورتحال سے موازنہ کرتے ہوئے کہا کہ وہاں کے لوگوں نے ان کی مرضی کے بغیر برسوں سے سیاسی اور آئینی تبدیلیوں کا سامنا کیا ہے۔

واضح رہے کہ یہ احتجاج ابتدائی طور پر نیٹ امتحان کی بے ضابطگیوں اور طلباء کے خدشات پر شروع ہوا تھا جو بعد میں دفعہ 370 اور مقبوضہ علاقے کے عوام کے حقوق سمیت وسیع سیاسی مطالبات تک پھیل گیا۔