اٹلی ویزا کے خواہشمند پاکستانیوں کیلئے نئی ہدایات جاری

اٹلی نے پاکستان سے شینگن، ورک، فیملی ری یونین اور اسٹڈی ویزا کے لیے درخواست دینے والے افراد کے لیے نئی ہدایات جاری کر دی ہیں۔

اسلام آباد میں موجود اطالوی سفارتخانے کے مطابق شینگن، فیملی ری یونین اور ورک ویزا کی درخواستیں متعلقہ بی ایل ایس ویزا ایپلیکیشن سینٹرز کے ذریعے جمع کروائی جائیں گی۔ پاکستان میں یہ مراکز اسلام آباد، لاہور، ملتان اور فیصل آباد میں موجود ہیں۔ ویزا کے خواہشمند افراد کو اپنی درخواست کے لیے مقررہ طریقہ کار پر عمل کرنا ہوگا۔

سفارتخانے نے بتایا کہ ویزا اپائنٹمنٹ حاصل کرنے کے لیے امیدواروں کو اٹلی ویزا کی متعلقہ آفیشل ویب سائٹ کے ذریعے درخواست دینی ہوگی۔ فیملی ری یونین اور ورک ویزا کے لیے درخواستوں کی تعداد زیادہ ہونے کی وجہ سے اس وقت ویٹنگ لسٹ موجود ہے۔ تاہم سفارتخانے کے مطابق ویٹنگ لسٹ میں شامل تمام افراد کو باری آنے پر اپائنٹمنٹ فراہم کی جائے گی۔

اطالوی یا یورپی یونین کے شہریوں کے اہل خانہ کے لیے ویزا اپائنٹمنٹ کا طریقہ کار مختلف ہے۔ ایسے افراد جو فیملی ری یونین کے تحت کسی اطالوی یا یورپی یونین کے شہری کے ساتھ شامل ہونا چاہتے ہیں، وہ براہ راست اطالوی سفارتخانے سے اپائنٹمنٹ کی درخواست کر سکتے ہیں۔ اس مقصد کے لیے انہیں سفارتخانے کو PEC کے ذریعے بھی رابطہ کرنا ہوگا۔ درخواست کے لیے درکار دستاویزات اور دیگر تفصیلات سفارتخانے کے آفیشل ذرائع سے حاصل کی جا سکتی ہیں۔

اسٹڈی ویزا کے خواہشمند پاکستانی طلبہ کے لیے بھی الگ طریقہ کار بتایا گیا ہے۔ اٹلی کی کسی یونیورسٹی میں تعلیم حاصل کرنے کے خواہشمند طلبہ کو سب سے پہلے Universitaly پورٹل کے ذریعے پری انرولمنٹ کا عمل مکمل کرنا ہوگا۔ اس عمل کی تصدیق ہونے کے بعد BLS کی جانب سے طالب علم سے رابطہ کیا جائے گا۔ اس کے بعد اسٹڈی ویزا کے لیے اپائنٹمنٹ کا طریقہ کار مکمل کیا جائے گا۔

اطالوی سفارتخانے نے طلبہ کو خاص طور پر خبردار کیا ہے کہ وہ عام شینگن یا ورک ویزا کی طرح اسٹڈی ویزا کے لیے خود سے اپائنٹمنٹ بک کرنے کی کوشش نہ کریں۔ انہیں یونیورسٹی کی پری انرولمنٹ اور متعلقہ تصدیقی مراحل مکمل کرنے کے بعد BLS کی جانب سے رابطے کا انتظار کرنا چاہیے۔

سفارتخانے نے ویزا اپائنٹمنٹ کے نام پر ہونے والے فراڈ سے بھی خبردار کیا ہے۔ حکام کے مطابق کچھ غیر قانونی ایجنٹ مبینہ طور پر پیسے لے کر ویزا اپائنٹمنٹ فراہم کرنے کا دعویٰ کر رہے ہیں۔ لیکن ویزا اپائنٹمنٹ خریدنے کی ضرورت نہیں ہے۔

اطالوی سفارتخانے نے شہریوں سے اپیل کی ہے کہ اگر کوئی شخص یا ایجنسی رقم کے بدلے ویزا اپائنٹمنٹ دینے کی پیشکش کرے تو اس کی اطلاع فوری طور پر سفارتخانے کو دی جائے۔ غیر قانونی سرگرمیوں کے خلاف کارروائی کی جا رہی ہے۔