ٹرمپ اور نیتن یاہو کی ملاقات، ایران میں حکومت کی تبدیلی کا معاملہ زیر بحث آنے کا امکان

اسرائیلی وزیراعظم نیتن یاہو صدر ٹرمپ کے ساتھ ملاقات میں ایران میں حکومت کی تبدیلی پر زور دیں گے، تاہم ٹرمپ کے اس پر آمادہ ہونے کے امکانات کم ہیں۔

مڈل ایسٹ انسٹی ٹیوٹ کے ماہر الیکس وٹانکا کا کہنا ہے کہ اسرائیلی وزیراعظم بنیامین نیتن یاہو وائٹ ہاؤس میں امریکی صدر ڈونلڈ ٹرمپ سے ملاقات کے دوران تہران میں حکومت کی تبدیلی کے نظریے پر بات چیت کریں گے۔

تاہم ان کا ماننا ہے کہ صدر ٹرمپ اس مطالبے کو تسلیم نہیں کریں گے کیونکہ وہ امریکی فوج کو کسی نئی زمینی جنگ میں نہیں دھکیلنا چاہتے۔ امریکہ میں یہ جنگ سیاسی طور پر شدید غیر مقبول ہو چکی ہے، جس کے باعث ٹرمپ انتظامیہ کی ترجیحات اسرائیلی مطالبات سے مختلف ہیں۔

یہ بھی پڑھیں : امریکی شہریوں کی اکثریت کا ٹرمپ کی پالیسی پر عدم اعتماد، ایران جنگ کی شدید مخالفت

اسرائیلی حکام ایران کے ساتھ طے پانے والے مفاہمتی یادداشت پر نالاں ہیں اور نیتن یاہو پر زور دے رہے ہیں کہ وہ ٹرمپ پر ایران کے بیلسٹک میزائل اور ایٹمی پروگرامز کو روکنے کے لیے دباؤ ڈالیں۔

امریکی انتظامیہ کا مؤقف ہے کہ فوجی نقطہ نظر سے وہ صرف ایک حد تک کارروائی کر سکتے ہیں، جب تک کہ وہ ایران پر مکمل قبضہ کرنے کا فیصلہ نہ کریں اور اس قدم کو کوئی بھی سنجیدگی سے نہیں لے رہا۔

صدر ٹرمپ اور نیتن یاہو کی اس ملاقات پر دنیا کی نظریں لگی ہوئی ہیں تاکہ دیکھا جا سکے کہ کیا دونوں رہنماؤں کے تعلقات میں تناؤ کا پرانا پیٹرن برقرار رہتا ہے یا کوئی نیا راستہ نکلتا ہے۔