جارحیت کرکے بھاگنے کا دور ختم ہوچکا، کمانڈرخاتم الانبیا بریگیڈ نے امریکا اور اسرائیل کو خبردار کردیا

کمانڈر خاتم الانبیا بریگیڈ نے امریکا اور اسرائیل کو کسی بھی نئی فوجی کارروائی سے خبردار کرتے ہوئے کہا ہے کہ جارحیت کے بعد واپس چلے جانے کا دور ختم ہو چکا ہے۔

ایرانی فوج کی خاتم الانبیا بریگیڈ کے اعلیٰ کمانڈر میجر جنرل علی عبداللہی نے اپنے بیان میں کہا کہ ایران کسی بھی ممکنہ خطرے سے نمٹنے کے لیے مکمل طور پر تیار ہے۔ ایرانی فوج کے پاس ضروری دفاعی صلاحیت بھی موجود ہے اور کسی بھی صورتحال سے نمٹنے کا واضح منصوبہ بھی تیار کیا جا چکا ہے۔

میجر جنرل علی عبداللہی نے امریکا اور اسرائیل کو مخاطب کرتے ہوئے کہا کہ ایران کے خلاف کسی بھی کارروائی کو آسان نہیں سمجھنا چاہیے۔ مخالف قوتوں کو اب اندازہ ہو چکا ہے کہ فوجی کارروائی کے سنگین نتائج سامنے آ سکتے ہیں۔ ایران اپنی دفاعی صلاحیت اور منصوبہ بندی کے حوالے سے پوری طرح تیار ہے۔

دوسری جانب امریکی اخبار نے دعویٰ کیا ہے کہ صدر ڈونلڈ ٹرمپ نے ایران کے خلاف تازہ حملوں کا حکم دے دیا ہے۔ رپورٹ میں کہا گیا ہے کہ امریکا اور اسرائیل ایران کی توانائی تنصیبات کو ممکنہ طور پر نشانہ بنانے کے منصوبے پر غور کر رہے ہیں۔