امریکا حقائق تسلیم کرے اور اپنے وعدوں کی پاسداری کرے، اسپیکر ایرانی پارلیمنٹ

ایرانی پارلیمنٹ کے اسپیکر محمد باقر قالیباف نے امریکا کی حالیہ حکمت عملی پر سخت ردعمل دیتے ہوئے اسے ناکام قرار دے دیا۔

محمد باقر قالیباف نے سوشل میڈیا پلیٹ فارم ایکس پر اپنے بیان میں امریکی پالیسی پر تنقید کرتے ہوئے کہا کہ امریکا کی جانب سے پہلے بڑے حملے کی بات کی جاتی ہے، لیکن کچھ ہی دیر بعد مذاکرات کی پیشکش سامنے آ جاتی ہے۔

امریکا کی جانب سے دھمکیوں اور مذاکرات کی بات ایک ساتھ کرنا کوئی نئی بات نہیں۔ قالیباف نے اسے بار بار دہرائی جانے والی ڈرامائی سفارت کاری قرار دیتے ہوئے واشنگٹن سے مطالبہ کیا کہ وہ زمینی حقائق کو تسلیم کرے۔

ایرانی اسپیکر کا بیان ایسے وقت میں سامنے آیا جب امریکی صدر ڈونلڈ ٹرمپ کی جانب سے ایران کے خلاف سخت کارروائی کی دھمکی کے بعد مذاکرات کی بات بھی کی گئی۔ قالیباف کے بیان سے ظاہر ہوتا ہے کہ تہران امریکی مؤقف میں آنے والی اس تبدیلی کو محتاط نظر سے دیکھ رہا ہے۔

محمد باقر قالیباف نے امریکا پر زور دیا کہ وہ ماضی میں کیے گئے وعدوں کی پاسداری کرے۔ صرف بیانات اور دھمکیوں سے مسائل حل نہیں ہوں گے۔ واشنگٹن کو اپنے وعدوں کو عملی اقدامات کے ذریعے ثابت کرنا ہوگا۔