ایران کے خلاف کارروائی ہوئی تو جواب اسی مقام پر دیا جائے گا؛ ایرانی صدر

ایرانی صدر مسعود پزشکیان نے کہا ہے کہ ایران کو دباؤ کے ذریعے تسلیم کرنے کی کوئی کوشش کامیاب نہیں ہوگی اور اگر ملک کو زبردستی جھکانے کی کوشش کی گئی تو ایران مزاحمت کرے گا۔

ٹیلی وژن پر نشر ہونے والے خطاب کے تیسرے اور آخری حصے میں مسعود پزشکیان نے کہا کہ ایران اپنے حقوق کے دفاع سے پیچھے نہیں ہٹے گا اور نہ ہی سر جھکائے گا۔ ان کا کہنا تھا کہ جب ایران اپنے حقوق کے تحفظ کی صلاحیت رکھتا ہے تو وہ ایسا راستہ کیوں اختیار کرے جو اسرائیل کی خواہش ہو۔

صدر پزشکیان نے ایران کی فوجی اور دفاعی صلاحیتوں سے دستبردار ہونے کے امکان کو بھی مسترد کرتے ہوئے کہا کہ ملک اپنی دفاعی طاقت اور عسکری صلاحیتوں پر کوئی سمجھوتہ نہیں کرے گا۔

ایرانی صدر نے حالیہ امریکی اور اسرائیلی حملوں کے دوران ایرانی مسلح افواج کی کارروائیوں کو دفاعی اقدام قرار دیتے ہوئے ان کی کارکردگی کو سراہا۔

انہوں نے کہا کہ ایران کو اپنے دفاع پر مجبور کیا گیا، جبکہ ایرانی ایرو اسپیس فورسز، فوج، پاسداران انقلاب اور دیگر اہلکاروں نے بھرپور دفاع کیا اور دنیا کو حیران کر دیا۔

مسعود پزشکیان نے امریکا اور اسرائیل پر الزام عائد کیا کہ وہ خلیجی ممالک کو ایران کے خلاف متحد کرنے کی کوشش کر رہے ہیں۔

انہوں نے کہا کہ ایران اس کوشش کو ناکام بنانے کے لیے کام کر رہا ہے۔ ان کا کہنا تھا کہ ایران مسلمانوں کے اتحاد پر یقین رکھتا ہے اور شیعہ اور سنی مسلمانوں کے درمیان اختلافات کو مسلمانوں کو تقسیم کرنے کی بنیاد نہیں سمجھتا۔

ایرانی صدر نے کہا کہ مسلمان ایک دوسرے کے بھائی ہیں اور یہ ان کا حقیقی عقیدہ ہے، محض سیاسی نعرہ نہیں۔

صدر پزشکیان نے ایران کی جانب سے علاقائی توسیع یا ہمسایہ ممالک پر حملے کے ارادے کی تردید کرتے ہوئے کہا کہ ایران کسی ملک کی سرزمین پر قبضہ یا اپنی سرحدیں بڑھانا نہیں چاہتا۔

انہوں نے کہا کہ ایران خطے کے ممالک کا ہمسایہ ہے، ان کے ساتھ سرحدیں رکھتا ہے اور تمام ممالک کو ایک دوسرے کے ساتھ مل کر رہنا چاہیے۔

مسعود پزشکیان نے حالیہ حملوں میں بعض علاقائی ممالک کی سرزمین استعمال کیے جانے کا حوالہ دیتے ہوئے کہا کہ ایران ان ممالک کو نشانہ بنانا نہیں چاہتا بلکہ ان مقامات کو نشانہ بناتا ہے جہاں سے اس پر حملہ کیا جاتا ہے۔

انہوں نے جنوبی ایران کے شہر میناب میں ایک اسکول پر حملے کا حوالہ دیتے ہوئے کہا کہ حملہ آوروں نے انہی مسلم اور دوست ممالک کی سرزمین کو استعمال کیا تھا۔