ایران کی امریکا کے سامنے شرائط؛ ایران کو پہنچائے گئے نقصانات کا پورا ہرجانہ دیا جائے

ایران نے آبنائے ہرمز کو مکمل طور پر کھولنے کے لیے امریکا کے سامنے چھ اہم شرائط رکھ دی ہیں۔

ایرانی قومی سلامتی کونسل کے سیکرٹری ذوالقدر نے اپنے بیان میں واضح کیا ہے کہ آبنائے ہرمز کی مکمل بحالی کا فیصلہ امریکا کے رویے اور آئندہ اقدامات سے جڑا ہوا ہے۔

ایرانی حکام کے مطابق امریکا کو ایران کو کسی بھی صورت میں دھمکی دینے سے گریز کرنا ہوگا۔ اس کی قوم کی توہین بھی قابل قبول نہیں ہوگی۔ ایران اور اس کے اتحادیوں کے خلاف جاری جنگ مستقل طور پر ختم کی جائے۔

ایران نے اپنی بحری ناکہ بندی ختم کرنے کا مطالبہ بھی کیا ہے۔ اس کے علاوہ امریکا سے کہا گیا ہے کہ وہ ایران کے اطراف میں موجود اپنی افواج کو واپس بلائے۔ خطے میں امریکی فوجی موجودگی کشیدگی میں اضافے کا سبب بن رہی ہے۔

ایران نے جنگ کے دوران ہونے والے نقصانات کے مکمل ازالے کا بھی مطالبہ کیا ہے۔ ایرانی مؤقف کے مطابق پہنچنے والے نقصان کا بغیر کسی کمی کے ہرجانہ ادا کیا جائے۔ اس کے ساتھ ایران پر عائد پابندیاں بھی ختم کرنے کی شرط رکھی گئی ہے۔ تہران ان پابندیوں کو غیرمنصفانہ اور غیرقانونی قرار دیتا ہے۔

ایرانی بیان میں منجمد ایرانی اثاثوں کی فوری اور غیر مشروط واپسی کا مطالبہ بھی کیا گیا ہے۔ ایران کا کہنا ہے کہ اس کے عوام کے اثاثے کسی شرط کے بغیر جاری کیے جائیں۔ ان مطالبات پر پیش رفت کے بغیر آبنائے ہرمز کو مکمل طور پر کھولنے کا فیصلہ نہیں کیا جائے گا۔

قومی سلامتی کونسل کے سیکرٹری ذوالقدر نے خبردار کیا ہے کہ اگر امریکا نے اپنا رویہ تبدیل نہ کیا تو آبنائے ہرمز دوبارہ نہیں کھولی جائے گی۔ ایران جنگ یا مذاکرات، دونوں صورتوں میں اپنے بنیادی مؤقف سے پیچھے نہیں ہٹے گا۔

دوسری جانب ایرانی وزیر خارجہ عباس عراقچی نے آبنائے ہرمز میں عارضی جہاز رانی کے راستے کے حوالے سے عمان کے ساتھ بات چیت کا ذکر کیا ہے۔ ان کے مطابق دونوں ممالک اس معاملے پر ایک معاہدے کے قریب پہنچ چکے ہیں۔ ایرانی مسلح افواج نے بھی آبنائے ہرمز میں ایک نیا راستہ تیار کر لیا ہے۔

عباس عراقچی نے واضح کیا کہ نیا راستہ تیار کرنے کا مطلب آبنائے ہرمز کا مکمل طور پر دوبارہ کھلنا نہیں ہے۔ آبنائے ہرمز کی صورتحال کئی دیگر عوامل سے بھی منسلک ہے۔ امریکا کو مفاہمت کی یادداشت کی خلاف ورزیوں کا ازالہ کرنا ہوگا۔

ایرانی وزیر خارجہ کے مطابق موجودہ صورتحال امریکا کی جانب سے مفاہمت کی یادداشت کی خلاف ورزی کا نتیجہ ہے۔ آبنائے ہرمز کے مستقبل کا فیصلہ آئندہ ہونے والی پیش رفت اور فریقین کے اقدامات کی بنیاد پر کیا جائے گا۔