ایک بھی امریکی فوجی نے ایرانی سرزمین پر قدم رکھا تو اسے زندہ نہیں چھوڑیں گے: کمانڈر ایرانی فوج

ایرانی فوج کی بری افواج کے کمانڈر بریگیڈیئر جنرل علی جہان شاہی نے خبردار کیا ہے کہ اگر کوئی امریکی فوجی ایرانی سرزمین پر قدم رکھتا ہے تو اسے زندہ نہیں چھوڑا جائے گا۔

ایرانی میڈیا کے مطابق بریگیڈیئر جنرل علی جہان شاہی نے اپنے بیان میں کہا کہ دشمن کی جانب سے کسی بھی کارروائی کا بھرپور اور مؤثر جواب دیا جائے گا۔

انہوں نے کہا کہ ایرانی بری افواج مکمل جنگی تیاری کی حالت میں ہیں اور ملک کی سرحدوں پر مسلسل نگرانی جاری ہے۔

ایرانی کمانڈر کا یہ بیان ایسے وقت سامنے آیا ہے جب خطے میں امریکی فوجی سرگرمیوں اور ایران کے خلاف ممکنہ زمینی کارروائی کے امکانات پر بحث جاری ہے۔

ایرانی فوجی قیادت اس سے قبل بھی واضح کر چکی ہے کہ ایرانی سرزمین پر کسی بھی زمینی دراندازی کو ایک مختلف اور سنگین نوعیت کی جارحیت تصور کیا جائے گا۔

رپورٹس کے مطابق ایران کے خلاف جاری تنازع میں اب تک زیادہ تر کارروائیاں فضائی حملوں، بحری آپریشنز اور میزائل حملوں تک محدود رہی ہیں اور امریکی فوج کی ایرانی سرزمین پر زمینی تعیناتی کی کوئی تصدیق سامنے نہیں آئی۔

ایرانی حکام کی جانب سے زمینی حملے کے خلاف مسلسل سخت بیانات کو ممکنہ امریکی زمینی کارروائی کی روک تھام کے لیے واضح پیغام بھی قرار دیا جا رہا ہے۔ تاہم یہ تعین کرنا مشکل ہے کہ بریگیڈیئر جنرل علی جہان شاہی کا بیان کسی مخصوص انٹیلی جنس اطلاع کی بنیاد پر ہے یا یہ محض ممکنہ زمینی حملے کو روکنے کے لیے دفاعی اور مزاحمتی پیغام کے طور پر دیا گیا ہے۔

ایرانی فوج نے واضح کیا ہے کہ ملک کی بری افواج مکمل طور پر چوکس ہیں اور کسی بھی ممکنہ خطرے سے نمٹنے کے لیے تیار ہیں۔