آبنائے ہرمز پر قبضے کی سوچ ٹرمپ کی سنگین غلطی ہے، پوری طاقت سے دفاع کریں گے، سربراہ ایرانی فوج

ایرانی فوج کے سربراہ نے ٹرمپ کے آبنائے ہرمز سے متعلق بیان کو سنگین غلطی قرار دیتے ہوئے کہا ہے کہ امریکی افواج کو خلیج میں داخلے کی اجازت نہیں دی جائے گی۔

ایرانی فوج کے کمانڈر ان چیف میجر جنرل امیر حاتمی نے امریکی صدر ڈونلڈ ٹرمپ کے اس بیان پر سخت ردعمل کا اظہار کیا ہے جس میں انہوں نے آبنائے ہرمز پر قبضہ کرنے کی خواہش ظاہر کی تھی۔

جنرل حاتمی نے کہا کہ ٹرمپ نے ایسا بیان دے کر ایک سنگین غلطی کی ہے، اور بعد میں اپنے بیان سے پیچھے ہٹنا یا اسے محض ایک مذاق قرار دینا اس کی سنگینی کو کسی طور پر کم نہیں کر سکتا۔

انہوں نے کہا کہ ایران نے عملًا امریکی افواج کو خطے سے نکالنے کے فیصلے پر عملدرآمد شروع کر دیا ہے اور اب امریکی فوجیوں کو خلیج، بحر عمان یا آبنائے ہرمز میں داخل ہونے کی اجازت نہیں دی جائے گی، اور نہ ہی ایران اب امریکی اڈوں کو ان کی پرانی حالت میں بحال ہونے دے گا۔

یہ بھی پڑھیں : جنگ کے بعد ایران کے معاشی مسائل کئی گنا بڑھ گئے، ایرانی صدر

جنرل حاتمی نے خبردار کرتے ہوئے کہا کہ ایران کے پاسبان ان لوگوں کو کچل دیں گے، جو اس کے قریب آئیں گے اور امریکہ کی کوئی بھی نئی غلطی اسے تاریخ میں دوسروں کے لیے عبرت کا نشان بنا دے گی۔

انہوں نے آبنائے ہرمز کو ایرانی عوام کے لیے ایک خدائی تحفہ قرار دیتے ہوئے کہا کہ یہ اپنی پرانی حالت میں واپس نہیں جائے گا اور ایران مسلح افواج کے سپریم کمانڈر کے احکامات کے تحت اپنی پوری طاقت سے اس کا دفاع کرے گا۔

انہوں نے مزید کہا کہ آبنائے ہرمز کو محفوظ رکھنے کے لیے ایران جو بھی قیمت ادا کرے گا، وہ بجا ہے، کیونکہ اب یہ آبنائے جنگ کو اس طرح ختم کرنے کی بنیادی شرائط میں شامل ہو چکا ہے کہ ایران سے اس کا خطرہ مکمل طور پر ختم ہو جائے۔

میجر جنرل حاتمی نے یہ بھی کہا کہ امریکی صدر کا ایک کارنامہ یہ بھی ہے کہ انہوں نے ان صلاحیتوں کو متحرک کر دیا ہے، جن کا ایران کو آبنائے ہرمز میں علم تھا، اور یہ جنگ کے بغیر متحرک نہیں ہو سکتی تھیں۔

انہوں نے اعلان کرتے ہوئے کہا کہ جو کوئی بھی کسی بھی جارح امریکی فوجی کو گرفتار کرے گا یا ہلاک کر کے ایرانی حکام کے حوالے کرے گا، اسے 30 ہزار ڈالر کا انعام دیا جائے گا۔