شام کے عسکری ایئرپورٹ پر پراسرار فضائی حملہ، رن وے مکمل تباہ، اسرائیل پر شک کا اظہار

شام میں بشار الاسد کی حکومت کے خاتمے کے بعد ادلب میں واقع ابو الظہور ملٹری ایئرپورٹ پر پہلا پراسرار فضائی حملہ کیا گیا، جس میں ایئرپورٹ کے رن وے کو شدید نقصان پہنچا ہے۔

شمالی شام کے صوبے ادلب کے مشرقی دیہی علاقے میں واقع اہم ترین ابو الظہور ملٹری ایئرپورٹ پر 4 شدید فضائی حملے کیے گئے ہیں۔ یہ دسمبر 2024 میں بشار الاسد کے اقتدار کے خاتمے کے بعد اس ایئرپورٹ پر ہونے والا پہلا حملہ ہے۔

حملے کے حوالے سے جاری ابتدائی اطلاعات کے مطابق ابھی تک کسی بھی ملک یا تنظیم نے ان حملوں کی باضابطہ تصدیق یا ذمہ داری قبول نہیں کی ہے اور نہ ہی شام کی نئی انتظامیہ کی طرف سے کوئی باضابطہ بیان جاری کیا گیا ہے۔

تاہم مختلف مقامی اور عسکری ذرائع کا کہنا ہے کہ یہ کارروائی اسرائیلی جنگی طیاروں کی ہو سکتی ہے۔ اس بات کی تصدیق ہو چکی ہے کہ حملے میں ایئرپورٹ کے رن وے کو براہ راست نشانہ بنایا گیا، جس سے مالی اور ڈھانچے کا شدید نقصان ہوا ہے، لیکن خوش قسمتی سے کسی جانی نقصان کی اطلاع نہیں ملی۔

یہ بھی پڑھیں : اسرائیلی وزیر کا غزہ میں روزانہ 30 سے 40 فلسطینیوں کو قتل کرنے کا مطالبہ

شام کے دیگر ایئرپورٹس بشمول حلب انٹرنیشنل ایئرپورٹ، نئرب عسکری ایئرپورٹ، حمص میں الشعیرات ایئرپورٹ، اور وسطی شام کے تیفاس اور الضبعہ ایئرپورٹس ماضی میں بھی حملوں کی زد میں آتے رہے ہیں۔

تاہم ابو الظہور ایئرپورٹ کو دسمبر 2024 میں بشار الاسد حکومت کے گرنے سے پہلے یا بعد میں کبھی اس طرح نشانہ نہیں بنایا گیا تھا۔

بشار الاسد کے اقتدار سے ہٹنے سے قبل یہ ایئرپورٹ شامی انقلابی دھڑوں اور سابق حکومت کی ملیشیاؤں کے درمیان مسلسل جنگی کنٹرول کی تبدیلی کی زد میں رہا۔

اسی وجہ سے یہ مقام ایرانی فورسز کے اثر و رسوخ اور ان کے اڈوں سے دور رہا تھا، یہی بنیادی وجہ تھی کہ اسرائیلی حملے زیادہ تر جنوبی شام یا ان علاقوں تک محدود رہے، جہاں ایران سے وابستہ گروپس اور مراکز موجود تھے۔ یہ حملہ ایک نئی عسکری تبدیلی کی نشاندہی کرتا ہے۔