ٹرمپ سے زیادہ ایک ٹیکسی ڈرائیور کی باتوں پر بھروسا کرتا ہوں، ایرانی جنرل کا امریکی صدر پر طنز

ایرانی پاسدارانِ انقلاب کے مشیر بریگیڈیئر جنرل محمد رضا نقدی کا کہنا ہے کہ ٹرمپ سے زیادہ ایک ٹیکسی ڈرائیور کی باتوں پر بھروسا کرتا ہوں۔

ایرانی پاسدارانِ انقلاب کے مشیر بریگیڈیئر جنرل محمد رضا نقدی نے امریکی صدر ڈونلڈ ٹرمپ کے ایران سے متعلق مؤقف پر سخت تنقید کی۔ انہوں نے امریکی صدر کو تنگ نظر اور بچکانہ قرار دیتے ہوئے کہا کہ ٹرمپ کے پاس مستقبل کے لیے کوئی واضح اور طویل المدتی وژن موجود نہیں۔

محمد رضا نقدی کے مطابق امریکی صدر دور رس سوچ اور مستقبل کے حالات کا اندازہ لگانے کی صلاحیت سے محروم دکھائی دیتے ہیں۔ کسی بھی ملک کی قیادت کے لیے طویل المدتی منصوبہ بندی ضروری ہوتی ہے، لیکن ٹرمپ کے بیانات میں ایسی سوچ نظر نہیں آتی۔

ایرانی جنرل نے امریکی صدر کو ناقابلِ بھروسہ بھی قرار دیا۔ ان کے مطابق ٹرمپ کے بیانات میں مستقل مزاجی نہیں پائی جاتی۔ وہ ایک وقت میں جو مؤقف اختیار کرتے ہیں، بعد میں اس میں تبدیلی آجاتی ہے۔ ایسی صورتحال میں امریکی بیانات کو مستقبل کی پالیسی کی بنیاد نہیں بنایا جاسکتا۔

محمد رضا نقدی نے دعویٰ کیا کہ امریکی صدر اپنے بیانات کے ممکنہ نتائج پر بھی زیادہ دیر تک غور نہیں کرتے۔ بعض بیانات کے اثرات چند گھنٹوں یا ایک دن کے بعد ہی سامنے آجاتے ہیں۔ اس وجہ سے امریکا کی عالمی ساکھ بھی متاثر ہوئی ہے۔

ایرانی پاسدارانِ انقلاب کے مشیر نے کہا کہ ایران کو امریکا کی جانب سے کیے جانے والے زبانی وعدوں پر انحصار نہیں کرنا چاہیے۔ کسی بھی وعدے پر اعتماد کرنے کے لیے قابلِ عمل اور قابلِ نفاذ ضمانتیں ضروری ہیں۔ صرف بیانات اور سیاسی یقین دہانیاں کافی نہیں ہوتیں۔

انہوں نے امریکی صدر پر طنز کرتے ہوئے کہا کہ وہ ٹرمپ کی باتوں کے مقابلے میں ایک ٹیکسی ڈرائیور کی بات پر زیادہ اعتماد کریں گے۔ ایرانی جنرل کا یہ بیان امریکا اور ایران کے درمیان جاری کشیدگی میں تہران کے سخت مؤقف کی عکاسی کرتا ہے۔

محمد رضا نقدی نے امریکا کے جنگی مقاصد سے متعلق دعویٰ کیا کہ واشنگٹن ایران میں حکومت کی تبدیلی اور ملک کو تقسیم کرنے کے مقاصد رکھتا تھا، تاہم امریکا اپنے ان اہداف کو حاصل کرنے میں کامیاب نہیں ہوسکا۔

ایرانی جنرل نے مزید دعویٰ کیا کہ امریکا ایران کے خلاف جنگ میں اپنے مقاصد حاصل کرنے میں ناکام رہا ہے۔ ایران نے دباؤ کے باوجود اپنے مؤقف کو برقرار رکھا اور امریکی منصوبے کامیاب نہیں ہوسکے۔