فی الحال امریکا کی جانب سے ایران پر مزید حملوں کی توقع نہیں، امریکی وزیرخارجہ

امریکی وزیر خارجہ مارکو روبیو نے مختلف ممالک کے وزرائے خارجہ کو آگاہ کیا ہے کہ فی الحال امریکا کی جانب سے ایران پر مزید فوجی حملوں کی توقع نہیں۔ امریکی نیوز ویب سائٹ کے مطابق روبیو نے حالیہ دنوں میں متعدد اتحادی ممالک کے حکام سے اس حوالے سے رابطہ کیا ہے۔

رپورٹ کے مطابق امریکی حکومت نے ایران کے خلاف فوجی کارروائی کے بجائے اقتصادی اور سفارتی دباؤ بڑھانے پر توجہ مرکوز کرنے کا فیصلہ کیا ہے۔ اتحادی ممالک کو بتایا گیا ہے کہ واشنگٹن ایران پر حملوں کی پالیسی سے پابندیوں اور دیگر معاشی اقدامات کی طرف منتقل ہو رہا ہے۔

مارکو روبیو کے مطابق امریکا اس وقت ایران پر دباؤ ڈالنے کے دیگر ذرائع استعمال کر رہا ہے۔ ان میں نئی پابندیوں کی مہم بھی شامل ہے۔ موجودہ توجہ ان اقدامات پر ہے جن کے ذریعے ایران پر معاشی دباؤ بڑھایا جا سکے۔

امریکی نیوز ویب سائٹ کے مطابق روبیو کی جانب سے اتحادی ممالک کو دی جانے والی بریفنگ خطے کی موجودہ صورتحال میں اہم پیش رفت ہے۔ اس سے یہ اشارہ ملتا ہے کہ واشنگٹن فوری طور پر کسی نئی فوجی کارروائی کے بجائے معاشی اقدامات کو ترجیح دے رہا ہے۔

امریکا کی جانب سے ایران کے خلاف نئی پابندیوں کا سلسلہ پہلے ہی شروع کیا جا چکا ہے۔ واشنگٹن ایران کی معیشت سے منسلک مختلف شعبوں اور اداروں پر دباؤ بڑھانے کی کوشش کر رہا ہے۔ پابندیوں کا مقصد ایران پر دباؤ برقرار رکھنا ہے۔

دوسری جانب ایران پہلے ہی امریکی اقتصادی اقدامات کو مسترد کرچکا ہے۔ ایرانی قیادت کا مؤقف ہے کہ پابندیاں ایرانی عوام کو مشکلات سے دوچار کرنے کی کوشش ہیں۔ تہران بیرونی دباؤ کے باعث اپنی پالیسی تبدیل نہیں کرے گا۔