نیپال اور چین کے سرحدی علاقے میں سیلاب سے ہلاکتوں کی تعداد 955 تک پہنچ گئی

نیپال اور چین کے سرحدی علاقوں میں آنے والے سیلاب اور مٹی کے تودے گرنے سے ہلاک ہونے والوں کی تعداد 955 ہو گئی، جبکہ 4 ہزار سے زائد لاپتہ ہیں۔

نیپال اور چین کے سرحدی علاقوں میں گزشتہ ہفتے آنے والے اچانک سیلاب اور تودے گرنے سے بڑے پیمانے پر تباہی پھیلی ہے، جس کے نتیجے میں دونوں ممالک کے حکام کے مطابق ہلاک ہونے والے افراد کی کل تعداد 955 تک پہنچ گئی ہے۔

نیپال اور چین کے سرکاری ذرائع کا کہنا ہے کہ اس قدرتی آفت کے بعد سے 4 ہزار 471 افراد تاحال لاپتہ ہیں، جن کی تلاش کے لیے وسیع پیمانے پر اقدامات جاری ہیں۔

یہ بھی پڑھیں : نیپال اور چین میں سیلاب سے تباہی، ہلاکتوں کی تعداد 686 ہو گئی، 3 ہزار افراد لاپتہ

ریسکیو حکام سینکڑوں نا شناخت شدہ لاشوں کو اجتماعی قبروں میں دفن کرنے پر مجبور ہیں۔ نیپال میں بجلی کے منصوبوں کی سرنگیں مٹی اور کیچڑ میں مکمل طور پر دھنس چکی ہیں، جہاں مختلف ہائیڈرو پاور پروجیکٹس کے 900 سے زائد مزدوروں کے پھنسے ہونے کا خدشہ ہے اور امدادی ٹیمیں ان تک پہنچنے کے لیے وقت کے خلاف دوڑ لگا رہی ہیں۔

چین کے سرکاری میڈیا کی رپورٹ کے مطابق تباہ حال جیرونگ پورٹ کے پورے علاقے میں اب صرف ایک واٹر ٹاور ہی قائم سلامت بچا ہے، جبکہ باقی تمام عمارتیں زمین بوس ہو چکی ہیں۔

محکمہ موسمیات نے جیرونگ اور اس کے اطراف کے علاقوں میں مزید شدید بارشوں کی پیش گوئی کی ہے، جس سے قریب ہی بننے والی عارضی جھیل میں پانی کی سطح خطرناک حد تک بڑھنے اور مزید تباہی کا شدید خطرہ موجود ہے۔