عرب ممالک امریکی افواج کو فوری نکالیں ورنہ تباہ کن جواب کے لیے تیار رہیں، پاسداران انقلاب

پاسداران انقلاب نے عرب ممالک پر زور دیا ہے کہ وہ اپنے علاقوں سے امریکی افواج کو فوراً نکال دیں ورنہ شدید عسکری ردعمل کا سامنا کرنے کے لیے تیار رہیں۔

ایران کی پاسداران انقلاب کے پولیٹیکل ڈپٹی جنرل یداللہ جوانی نے خطے کے عرب ممالک کو مخاطب کرتے ہوئے ایک انتہائی سخت بیان جاری کیا ہے۔

یہ بھی پڑھیں : پاکستان کا امریکہ ایران کشیدگی پر تشویش کا اظہار، امن کا واحد راستہ مذاکرات ہی ہیں، دفتر خارجہ

نیم سرکاری خبر رساں ایجنسی کو دیئے گئے اپنے بیان میں انہوں نے واضح طور پر کہا کہ عرب ممالک کے لیے اب یہی بہتر ہے کہ وہ اپنے ممالک سے امریکی فورسز کو نکال باہر کریں اور اپنی تمام عسکری بیسز کا کنٹرول خود سنبھال لیں۔

جنرل یداللہ جوانی نے انتباہ جاری کرتے ہوئے کہا کہ ایرانی فوج یہ ثابت کر چکی ہے کہ اگر ایران پر حملے کے لیے کسی بھی ملک کی سر زمین یا بیس کا استعمال کیا گیا تو ایران اس جگہ پر انتہائی فیصلہ کن اور سخت ترین جوابی کارروائی کرے گا۔

انہوں نے اپنے اس انتباہی بیان میں بالخصوص کویت، بحرین اور اردن کے نام لیے اور کہا کہ ان ممالک کو امریکہ کی جانب سے اپنی سرزمین ایران کے خلاف استعمال نہیں ہونے دینی چاہیے۔