یورپی یونین ایران کے خلاف امریکی معاشی پابندیوں کی مہم میں شامل ہو گئی، اسکاٹ بیسنٹ

یورپی یونین نے ایران کے خلاف امریکا کی معاشی پابندیوں کی مہم آپریشن اکنامک آؤٹ کاسٹ میں باقاعدہ طور پر شامل ہونے کا اعلان کر دیا ہے۔

یورپی یونین نے ایران کے خلاف امریکی حکومت کی طرف سے شروع کی جانے والی معاشی دباؤ کی عالمی مہم میں رسمی طور پر شمولیت اختیار کر لی ہے۔ امریکی وزیرِ خزانہ اسکاٹ بیسنٹ نے اس اہم پیشرفت کی تصدیق کرتے ہوئے یورپی یونین کے اس قدم کا خیرمقدم کیا ہے۔

سوشل میڈیا پلیٹ فارم ایکس پر اپنے ایک بیان میں اسکاٹ بیسنٹ نے لکھا کہ واشنگٹن انتظامیہ یورپی یونین کے اس سخت اور بروقت فیصلے کی مکمل قدر کرتی ہے اور اسے ایرانی معیشت کو تنہا کرنے کی کوششوں میں ایک بڑی پیشرفت سمجھتی ہے۔

یہ بھی پڑھیں : ایرانی حملے صرف امریکی فوجی تنصیبات تک محدود تھے، سرکاری قطری رپورٹ میں تصدیق

امریکی وزیرِ خزانہ کا کہنا تھا کہ امریکا اپنے تمام عالمی اتحادیوں کے ساتھ مضبوطی سے کھڑا ہے تاکہ یہ یقینی بنایا جا سکے کہ ایرانی حکومت اپنے جوہری اور عسکری پروگراموں کے لیے عالمی مالیاتی نظام سے کسی بھی قسم کا فائدہ نہ اٹھا سکے۔

اسکاٹ بیسنٹ نے دعویٰ کیا کہ اس وقت پوری دنیا تہران کو ایک واضح اور سخت پیغام دے رہی ہے کہ جب تک ایران کی باقی ماندہ تمام مالیاتی اور اقتصادی شاہ رگوں کو مکمل طور پر کاٹ نہیں دیا جاتا، اس وقت تک یہ معاشی کارروائیاں اور پابندیاں جاری رہیں گی۔

یورپی یونین کی اس شمولیت سے ایران پر عائد مغربی پابندیوں کے دائرہ کار میں مزید شدت آنے کا امکان ظاہر کیا جا رہا ہے۔