سعودی عرب نے حالیہ حملوں کے بعد اہم آئل پائپ لائن عارضی طور پر بند کر دی

سعودی عرب نے ریاض اور مدینہ کے علاقوں میں ہونے والے حملوں کے بعد مشرقی، مغربی آئل پائپ لائن کو احتیاطی طور پر عارضی طور پر بند کردیا۔

خبر ایجنسی کے مطابق سعودی وزارتِ توانائی نے بتایا کہ مشرقی، مغربی پائپ لائن آبنائے ہرمز کو بائی پاس کرتے ہوئے سعودی تیل کی برآمد میں اہم کردار ادا کرتی ہے۔ پائپ لائن کو ریاض اور مدینہ کے علاقوں میں متعدد حملوں کے بعد عارضی طور پر معطل کیا گیا ہے۔

سعودی وزارتِ توانائی نے ایکس پر جاری بیان میں کہا کہ پائپ لائن کی سرگرمیاں احتیاطی اقدام کے طور پر روکی گئی ہیں۔

وزارتِ توانائی کے مطابق آئل پائپ لائن کو جمعرات کی صبح نشانہ بنایا گیا تھا، جس کے نتیجے میں متعدد افراد زخمی ہوئے۔

یہ پیش رفت ایسے وقت میں سامنے آئی ہے جب یمن سے متعلق خطے میں کشیدگی برقرار ہے اور حوثی ملیشیا کی کارروائیوں کے باعث بحیرۂ احمر کے ساحلی علاقوں کی صورتحال بھی مسلسل توجہ کا مرکز بنی ہوئی ہے۔

سعودی عرب کی جانب سے پائپ لائن کو عارضی طور پر بند کرنے کا فیصلہ اہم توانائی تنصیبات کے تحفظ اور تیل کی برآمدی سرگرمیوں کو محفوظ رکھنے کے لیے کیا گیا ہے۔