یمن کے مسائل فوجی کشیدگی سے حل نہیں ہونگے، مذاکرات کی بحالی میں تعاون کیلیے تیار ہیں؛ ایران

ایرانی وزارت خارجہ نے کہا ہے کہ خطے میں امن و استحکام کا قیام یمن کی آزادی، خودمختاری اور علاقائی سالمیت کے احترام سے وابستہ ہے۔

ایرانی وزارت خارجہ کے ترجمان نے کہا کہ یمن کے مسائل محاصرے اور فوجی کشیدگی کو جاری رکھ کر حل نہیں کیے جاسکتے۔ ان کے مطابق یمنی عوام کو دباؤ اور دھمکیوں سے آزاد ہوکر باعزت زندگی گزارنے کا حق حاصل ہے۔

ترجمان نے یمن کے حوالے سے طے شدہ روڈ میپ کے مطابق مذاکرات فوری طور پر بحال کرنے اور اس پر عمل درآمد کی ضرورت پر زور دیا۔

انہوں نے کہا کہ یمن کے مسئلے کے سیاسی حل اور مذاکرات کی بحالی کے لیے ہونے والی ہر مثبت کوشش میں ایران تعاون کے لیے تیار ہے۔

ایرانی وزارت خارجہ کے مطابق یمن میں پائیدار امن کے لیے ملک کی خودمختاری اور علاقائی سالمیت کا احترام کرتے ہوئے سیاسی اور مذاکراتی عمل کو آگے بڑھانا ضروری ہے۔