سوائے ایران کے کسی میں امریکی بحریہ یا جنگی جہازوں کو للکارنے کی جرات نہیں ہوئی، ایرانی فوجی عہدیدار

ایرانی اعلیٰ فوجی عہدیدار نے دعویٰ کیا ہے کہ ایرانی حملوں نے امریکی جنگی جہازوں کو شدید نقصان پہنچایا ہے اور دشمن کو دفاعی پوزیشن پر مجبور کر دیا ہے۔

ایران کی مسلح افواج کے ڈپٹی چیف آف اسٹاف بریگیڈیئر جنرل کیومرث حیدری نے تقریب سے خطاب کرتے ہوئے کہا ہے کہ ایرانی فورسز نے حالیہ حملوں کے دوران امریکی جنگی جہازوں کو شدید نقصان پہنچایا ہے۔ ایران نے دشمن کو اس کے مقاصد کے حصول سے روک کر فتح حاصل کی ہے۔

انہوں نے کہا کہ آج اس میں کوئی شک نہیں کہ ہماری مسلح افواج میدان جنگ میں فاتح ہیں کیونکہ اگر کوئی دفاع کرنے والا حملہ آور کو پہلے سے طے شدہ وقت اور جگہ پر اس کے مقاصد تک پہنچنے سے روک دے تو وہ فاتح ہوتا ہے۔

یہ بھی پڑھیں : چین کا امریکا اور ایران پر اسلام آباد مفاہمتی یادداشت کے تحت مذاکرات پر زور

ان کا کہنا تھا کہ جو دشمن اس نظام کا تختہ الٹنے کے خواب دیکھ رہا تھا، وہ اب میدان جنگ میں دفاعی پوزیشن پر عمل کر رہا ہے۔

انہوں نے مزید کہا کہ امریکی فوجی طاقت کا عروج اس کی بحریہ اور اس کے جنگی جہاز ہیں اور تاریخ میں دوسری جنگ عظیم سے لے کر آج تک کسی بھی طاقت نے امریکی جنگی جہاز یا اس کی بحری طاقت کو چیلنج کرنے کی جرأت نہیں کی تھی لیکن چند راتوں پہلے ہمارے میزائلوں نے ان کے بھاری جنگی جہازوں اور فریگیٹس کو نشانہ بنایا اور انہیں شدید نقصان پہنچایا۔

سینئر کمانڈر نے کہا کہ ایران کے حملوں نے امریکہ کو اپنی فورسز کو ایران سے کم از کم 500 کلومیٹر دور منتقل کرنے پر مجبور کر دیا۔

انہوں نے کہا کہ ایران نے انتہائی سخت پابندیوں کے تحت اپنی دیسی دفاعی صنعت تیار کی ہے، جو اس بات کا ثبوت ہے کہ ملک اپنی اندرونی صلاحیتوں پر بھروسہ کرتے ہوئے ہر جارحانہ اقدام کا بھرپور جواب دے رہا ہے۔