امریکہ جانے والے بحری جہازوں پر ایران کے مبینہ سائبر حملے کی تحقیقات کا آغاز

امریکی حکومت 2 غیر ملکی بحری جہازوں پر ہونے والے سائبر حملوں کی تحقیقات کررہی ہے، جو امریکہ کی جانب سفر کررہے تھے۔

وال اسٹریٹ جرنل کی رپورٹ کے مطابق امریکی حکام کو شبہ ہے کہ ایران یا خطے میں جاری تنازع سے فائدہ اٹھانے والے دیگر عناصر سائبر حملوں کے ذریعے مشرق وسطیٰ کے تنازع کو مزید پھیلانے کی کوشش کرسکتے ہیں۔

رپورٹ کے مطابق دونوں بحری جہازوں کو اگست کے اوائل میں آبنائے جبرالٹر سے گزرتے ہوئے سائبر حملوں کا نشانہ بنایا گیا۔ آبنائے جبرالٹر عالمی توانائی کی ترسیل کے لیے اہم بحری راستہ ہے۔

ایک ٹینکر مصر سے 20 لاکھ سے زائد بیرل خام تیل لے کر امریکی ریاست ٹیکساس کی جانب جارہا تھا، جبکہ دوسرا ٹینکر مائع پٹرولیم گیس لینے کے لیے امریکہ کی طرف روانہ تھا۔ امریکی حکام نے دونوں جہازوں کے کمپیوٹر اور آپریشنل نظام میں مداخلت کے شواہد ملنے کے بعد تحقیقات شروع کیں۔

یہ بھی پڑھیں : امریکی ایوان نمائندگان میں ایران اور روس پر سخت پابندیوں کا بل منظور

امریکی وفاقی تحقیقاتی ادارے کے اہلکاروں نے 21 اور 24 اگست کو خلیج میکسیکو پہنچنے کے بعد دونوں غیر ملکی پرچم بردار جہازوں پر سوار ہوکر ان کے آپریشنل اور معلوماتی ٹیکنالوجی نظام کا معائنہ کیا۔

یہ کارروائی اس بات کو یقینی بنانے کے لیے کی گئی کہ سائبر حملوں کے بعد جہازوں کے آپریشنل اور معلوماتی نظام محفوظ اور قابل اعتماد حالت میں ہیں۔

رپورٹ کے مطابق کسی گروپ نے ان حملوں کی ذمہ داری قبول نہیں کی اور ابھی تک یہ ثابت نہیں ہوسکا کہ ان حملوں کے پیچھے ایران تھا یا کوئی دوسرا فریق۔

امریکی حکام کے لیے تشویش کی ایک وجہ یہ بھی ہے کہ جہازوں کے آپریشنل نظام میں سائبر مداخلت سے سمندری سفر کے دوران سنگین حادثات پیدا ہوسکتے ہیں۔ ایسے حملوں سے آگ لگنے، دھماکے یا تیل کے سمندر میں پھیلنے جیسے خطرات پیدا ہوسکتے ہیں۔