ایران کا کینیڈین وزیراعظم کے بیان پر شدید ردعمل، منافقت کا سہارا ہمیشہ نہیں چل سکتا: اسماعیل بقائی

ایرانی وزارت خارجہ نے کینیڈین وزیراعظم کی جانب سے ایران کو ملنے والی تباہی کی دھمکی کو جنگ کی زبان قرار دینے پر شدید الفاظ میں تنقید کی ہے۔

ایرانی وزارت خارجہ کے ترجمان اسماعیل بقائی نے سوشل میڈیا پلیٹ فارم ایکس پر اپنے ایک بیان میں کینیڈین وزیراعظم مارک کارنے کے بیان پر سخت ردعمل کا اظہار کیا ہے۔

کینیڈین وزیراعظم نے ایران کو ملنے والی تباہی کی دھمکی کو محض جنگ کی زبان قرار دیا تھا۔ ترجمان نے دوٹوک الفاظ میں کہا کہ مارک کارنے کو یہ بات اچھی طرح سمجھ لینی چاہیے کہ وقت بہت بے رحم ہے اور فریب اور منافقت کا یہ سہارا ہمیشہ قائم نہیں رہ سکتا۔

یہ بھی پڑھیں : اسحاق ڈار کی ایرانی ہم منصب سے نیویارک میں ملاقات، امن کیلئے سفارتکاری پر زور

ترجمان نے مزید کہا کہ جو لوگ امریکی غنڈہ گردی کے طویل سائے میں پناہ تلاش کرتے ہیں، وہ بالآخر یہ سبق سیکھ لیں گے کہ حقیقت سے آنکھیں چرانا اور اپنی عزت و خودداری کو داؤ پر لگانے کے باوجود کوئی بچ نہیں سکتا۔

انہوں نے اس عزم کا اظہار کیا کہ ایران کے خلاف پرانے معاہدے کرنے والے جلد دیکھ لیں گے کہ جس قوم کو وہ دبانا چاہتے تھے وہ اصولوں پر قائم رہی ہے۔