2025 میں پاکستانیوں نے گوگل پر سب سے زیادہ کیا تلاش کیا؟ نتائج سامنے آگئے

پاکستان میں 2025 میں سب سے زیادہ سرچ کیے جانے والے موضوعات اور شخصیات کی تفصیلات گوگل نے جاری کر دی ہیں۔

 رپورٹ کے مطابق پاکستانی انٹرنیٹ صارفین نے مختلف شعبوں میں دلچسپی دکھائی، جس میں کھیل، سیاست اور شوبز انڈسٹری شامل ہیں۔ کھیلوں کے حوالے سے سب سے زیادہ سرچ کیے جانے والے کھلاڑی بھارتی کرکٹر ابھشیک شرما رہے۔

مقامی کرکٹ کے حوالے سے صارفین نے حسن نواز، عرفان خان نیازی، صاحبزادہ فرحان، محمد عباس اور صائم ایوب کے بارے میں معلومات حاصل کرنے میں دلچسپی دکھائی۔

سیاست میں بانی تحریک انصاف عمران خان سب سے زیادہ سرچ کی جانے والی شخصیت رہیں، جس سے ظاہر ہوتا ہے کہ عوام کی توجہ اب بھی سیاسی منظرنامے پر مرکوز ہے۔ دیگر مشہور شخصیات میں سابق فاسٹ بولر شعیب اختر اور معروف گلوکار عاطف اسلم شامل ہیں، جو عوام میں اپنی مقبولیت کے لحاظ سے نمایاں رہے۔

شوبز انڈسٹری میں خواتین میں ماہرہ خان، اقرا عزیز اور ہانیہ عامر سب سے زیادہ مقبول رہیں اور ان کی نجی و پیشہ ورانہ زندگی صارفین کے لیے دلچسپی کا مرکز بنی رہی۔ مرد اداکاروں میں فہد مصطفیٰ اور وہاج علی سب سے زیادہ سرچ کیے گئے، جبکہ دانش تیمور اپنے حالیہ ڈرامہ سیریل ’شیر‘ کی کامیابی کی وجہ سے خبروں اور سرچ انجن پر چھائے رہے۔

گوگل کے یہ ٹرینڈز ظاہر کرتے ہیں کہ پاکستانی صارفین کھیل، سیاست اور شوبز کے ہر اہم واقعے پر گہری نظر رکھتے ہیں۔ یہ اعداد و شمار نہ صرف عوامی پسند کی عکاسی کرتے ہیں بلکہ آنے والے سال میں نئے اسٹارز کی مقبولیت کے بارے میں بھی اشارہ دیتے ہیں۔