ہمارا جواب مثبت ہے، عالمی ضمانتوں کے بغیر کوئی معاہدہ قبول نہیں، ایرانی حکام

ایران کے ایک اعلیٰ عہدیدار نے تہران کی جانب سے امریکی منصوبے پر دیئے گئے جواب کو مثبت اور حقیقت پسندانہ قرار دیتے ہوئے کہا ہے کہ ان کی توجہ پورے خطے بالخصوص لبنان میں جنگ کے خاتمے پر مرکوز ہے۔

ایران کے ایک اعلیٰ سرکاری عہدیدار نے نام ظاہر نہ کرنے کی شرط پر بتایا ہے کہ تہران نے امریکی امن منصوبے کا جو جواب دیا ہے وہ انتہائی مثبت اور زمینی حقائق کے مطابق ہے۔

اس عہدیدار کا کہنا ہے کہ ایران کی اولین ترجیح پورے خطے میں جاری کشیدگی کا خاتمہ ہے، خاص طور پر لبنان میں فوری جنگ بندی تہران کے ایجنڈے میں سب سے اوپر ہے۔

ایران نے اپنے جواب میں امریکہ کے ساتھ طویل عرصے سے چلے آ رہے اختلافات کو حل کرنے کی خواہش کا اظہار کیا ہے اور اس مقصد کے لیے جوہری پروگرام، پابندیوں کے مکمل خاتمے اور آبنائے ہرمز کے معاملات پر تفصیلی مذاکرات کی پیشکش کی ہے۔

یہ بھی پڑھیں : تہران کا جواب ناقابل قبول ہے، صدر ٹرمپ نے ایران کی امن تجاویز کو مسترد کردیا

ایرانی عہدیدار نے اس بات پر زور دیا کہ کسی بھی قسم کے معاہدے کے لیے ایک ایسا واضح اور ضمانت شدہ طریقہ کار ہونا چاہیے، جو تمام معاشی پابندیوں کے خاتمے کو یقینی بنا سکے۔

تہران کا مطالبہ ہے کہ امریکہ کے ساتھ جو بھی سمجھوتہ طے پائے، اس پر عمل درآمد کے لیے عالمی سطح پر ٹھوس ضمانتیں فراہم کی جائیں تاکہ ماضی کی طرح معاہدے کی خلاف ورزی نہ ہو سکے۔

یہ جواب ایران کے اعلیٰ ترین قومی مفادات اور خطے کے دیگر ممالک کے ساتھ کی گئی وسیع تر مشاورت کی روشنی میں تیار کیا گیا ہے، جس کا مقصد مشرق وسطیٰ میں مستقل امن و استحکام لانا ہے۔