امریکی کمپنیوں کی اجارہ داری کو خطرہ، چینی چپ ساز کمپنیاں تیزی سے جگہ بنانے میں کامیاب

عالمی سطح پر ٹیکنالوجی کے شعبے میں خود کفالت کی جانب بڑھتے ہوئے چین کی میموری چپ سازی کی صنعت نے ایک بہت بڑا سنگ میل عبور کر لیا ہے۔

چین کی سیکیورٹیز ریگولیٹری اتھارٹی نے اس بات کی تصدیق کی ہے کہ ملک کی معروف چپ ساز کمپنی یانگزی میموری ٹیکنالوجیز نے اپنے ابتدائی عوامی غوغا یعنی آئی پی او کی ٹیوٹرنگ فائلنگ رجسٹریشن کا عمل کامیابی سے مکمل کر لیا ہے۔

دوسری بڑی کمپنی چانگ زن میموری ٹیکنالوجیز کی اسٹار مارکیٹ میں لسٹنگ کے لیے معطل شدہ جائزے کا عمل دوبارہ بحال کر دیا گیا ہے۔ ان دونوں کمپنیوں کی اس پیش رفت کے پیچھے موجود مالیاتی نتائج انتہائی حیران کن اور غیر معمولی ہیں۔

چانگ زن میموری ٹیکنالوجیز نے سال 2026 کی پہلی سہ ماہی میں 50 ارب 80 کروڑ یوآن یعنی 7 ارب 50 کروڑ امریکی ڈالر کی ریکارڈ آمدنی حاصل کی ہے، جو کہ گزشتہ سال اسی عرصے کے دوران ہونے والے خالص نقصان کے بعد سالانہ بنیادوں پر 719 فیصد کا شاندار اور تاریخی اضافہ ہے۔

یہ بھی پڑھیں : یہودی لابی کا امریکی شہریوں پر فلسطینیوں سے جانوروں جیسا سلوک رکھنے کا دباؤ ہے، جینرک یوگر

کمپنی نے سال 2026 کی پہلی چھماہی کے لیے 110 سے 120 ارب یوآن کی آمدنی اور 66 سے 75 ارب یوآن کے خالص منافع کی پیش گوئی کی ہے۔

دوسری جانب یانگزی میموری ٹیکنالوجیز نے بھی مضبوط معاشی ترقی کی رپورٹ پیش کی ہے، جس کے مطابق پہلی سہ ماہی میں کمپنی کی آمدنی 20 ارب یوآن سے تجاوز کر گئی ہے، جو کہ سالانہ بنیادوں پر دگنے سے بھی زیادہ ہے۔

اس کمپنی کی نینڈ فلیش چپ کی پیداوار اب عالمی منڈی کے 10 فیصد سے زیادہ حصے پر قابض ہو چکی ہے، جس کے بعد یہ کمپنی دنیا میں تیسرے نمبر پر سب سے بڑی پوزیشن حاصل کرنے کے بالکل قریب پہنچ گئی ہے۔

واضح رہے کہ عالمی میموری چپ مارکیٹ پر طویل عرصے سے سیمسنگ، ایس کے ہائینکس اور مائیکرون جیسی کمپنیوں کا راج رہا ہے، جنہوں نے سال 2025 کی چوتھی سہ ماہی میں ڈی ریم مارکیٹ کے 90 فیصد سے زائد حصے پر قبضہ کر رکھا تھا، لیکن اب چینی کمپنیاں اس شعبے میں تیزی سے داخل ہو رہی ہیں۔

صنعت کے ماہرین کا کہنا ہے کہ چینی میموری چپ ساز اب ترقی کے اس مرحلے سے باہر نکل آئے ہیں، جہاں بھاری سرمائے کی ضرورت ہوتی ہے اور اب وہ مالیاتی منافع کمانے کے دور میں داخل ہو چکے ہیں، جس سے گھریلو سطح پر متبادل چپس کی فراہمی تیز ہوگی اور وہ عالمی چپ انڈسٹری کے اعلیٰ ترین درجے تک پہنچ جائیں گے۔