کائلان ایمباپے نے ورلڈ کپ کے ناک آؤٹ مرحلے میں سب سے زیادہ گولز کا عالمی ریکارڈ توڑ دیا

فرانسیسی کپتان کائلان ایمباپے اور کوچ ڈیڈیئر ڈیسچیمپس نے سویڈن کے خلاف فتح کے ساتھ ہی فٹ بال ورلڈ کپ میں نئے عالمی ریکارڈز قائم کر دیے۔

سویڈن کے خلاف 3-0 کی شاندار فتح کے دوران فرانس کے کپتان کائلان ایمباپے اور کوچ ڈیڈیئر ڈیسچیمپس نے فیفا ورلڈ کپ کی تاریخ میں نئے سنگ میل عبور کر لیے ہیں۔

کائلان ایمباپے ورلڈ کپ کے ناک آؤٹ مرحلے کی تاریخ میں سب سے زیادہ 10 گول کرنے والے دنیا کے پہلے کھلاڑی بن گئے ہیں، انہوں نے برازیل کے رونالڈو کا 8 گولز کا ریکارڈ توڑ دیا ہے۔

اس میچ میں کیے گئے 2 گولز کے بعد ایمباپے اس سال کے ٹورنامنٹ میں 6 گولز کے ساتھ لیونل میسی کے برابر آ گئے ہیں۔

یہ بھی پڑھیں : فرانس نے سویڈن کو 3-0 سے ہرا کر ورلڈ کپ کے آخری 16 میں جگہ بنا لی

یہ کائلان ایمباپے کا اپنے 18 ویں ورلڈ کپ میچ میں 18 واں گول تھا اور وہ لیونل میسی کے آل ٹائم 19 گولز کے عالمی ریکارڈ سے صرف ایک گول کی دوری پر ہیں۔

دوسری جانب 57 سالہ کوچ ڈیڈیئر ڈیسچیمپس نے بطور منیجر ورلڈ کپ میں سب سے زیادہ 18 میچز جیتنے کا اپنا ہی ریکارڈ مزید مضبوط کر لیا ہے۔

فرانسیسی ٹیم کا اگلا مقابلہ ہفتے کے روز فلیڈلفیا میں پیراگوئے سے ہوگا، جس نے چار بار کی چیمپئن جرمنی کو پنالٹی شوٹ آؤٹ پر شکست دے کر دنیا کو حیران کر دیا تھا۔