ایران کے خلاف جنگ کے باعث امریکہ کا قومی قرضہ پہلی بار 40 کھرب ڈالر کی تاریخی سطح سے تجاوز کر گیا

امریکہ کا قومی قرضہ ملکی تاریخ میں پہلی بار 40 کھرب ڈالر کی ریکارڈ سطح سے تجاوز کر گیا، جس کی بڑی وجہ دفاعی اخراجات اور خسارے میں اضافہ ہے۔

امریکہ کا مجموعی قومی قرضہ تاریخ میں پہلی بار 40 کھرب ڈالر سے تجاوز کر گیا ہے۔ امریکی وزارت خزانہ کے اعداد و شمار کے مطابق دفاعی اخراجات، سماجی بہبود کے پروگراموں اور بجٹ خسارے پر بڑھتے ہوئے سود کی ادائیگیوں نے امریکی حکومت کے اخراجات کو بے پناہ بڑھا دیا ہے۔

قرضے کا یہ نیا ریکارڈ اس سے پہلے مارچ میں قائم ہونے والے 39 کھرب ڈالر کے ریکارڈ کے صرف 5 ماہ بعد سامنے آیا ہے۔

یہ بھی پڑھیں : امریکی معاشی کارروائی مبالغہ آرائی اور نفسیاتی جنگ ہے، ایرانی خبر رساں ادارے

مالیاتی ماہرین کی پیشگوئیوں سے کہیں پہلے قرضے کا اس سطح تک پہنچنا تشویشناک سمجھا جا رہا ہے۔ اس کی ایک بڑی وجہ صدر ٹرمپ کی جانب سے غیر قانونی قرار دی جانے والی تجارتی بندشوں کی وجہ سے ہونے والا اربوں ڈالر کا مالیاتی نقصان ہے، جس کی بھرپائی کے لیے حکومت کو تیزی سے مزید قرض لینا پڑا۔

قرض کے یہ نئے اعداد و شمار امریکی انتظامیہ کی ترجیحات کی نشاندہی کرتے ہیں، جس میں دفاعی اخراجات میں اضافہ شامل ہے تاکہ ایران کے خلاف جنگ جاری رکھی جا سکے، جبکہ دوسری جانب ایندھن اور خوراک کی قیمتوں کو کم کرنے کی کوششیں بھی جاری ہیں۔

رپورٹس کے مطابق پچھلے 20 سال کے دوران امریکہ کا قرضہ 4 گنا بڑھ چکا ہے، جبکہ صدر ٹرمپ اور جو بائیڈن کی صدارت کے دوران گزشتہ 10 سال سے بھی کم عرصے میں یہ قرضہ دو گنا سے بھی زیادہ ہو چکا ہے۔