غزہ سے فلسطینیوں کو نکالنا ہی واحد حل ہے، اسرائیلی وزیر دفاع

اسرائیلی وزیر دفاع کا کہنا ہے کہ غزہ سے فلسطینی شہریوں کو نکالنا اور علاقے کی آبادی کو خالی کروانا ہی اسرائیل کے نزدیک واحد حل ہے۔

اسرائیل کے وزیر دفاع اسرائیل کاٹز نے ایک بار پھر اپنے متنازع اور نسل پرستانہ عزائم کا اظہار کرتے ہوئے کہا ہے کہ اسرائیل اب بھی غزہ کی پٹی سے تمام فلسطینی شہریوں کو بے دخل کرنے اور علاقے کو خالی کروانے کی کوششیں کر رہا ہے۔ غزہ کے مسئلے کا یہی واحد اور حتمی حل ہے۔

اسرائیلی اخبار کی ایک کانفرنس میں گفتگو کرتے ہوئے صہونی وزیر دفاع نے کہا کہ امریکی صدر ڈونلڈ ٹرمپ نے فلسطینیوں کو باہر منتقل کرنے کی اس تجویز کو رد نہیں کیا ہے بلکہ اسے صرف عارضی طور پر معطل یا منجمد کیا ہے اور اس منصوبے پر پس پردہ بات چیت مسلسل جاری ہے۔

اسرائیلی وزیر دفاع کاٹز نے اعتراف کیا کہ اس انتہائی متنازع منصوبے پر عمل درآمد کے لیے اسرائیل کو امریکہ کی مکمل سفارتی اور سیاسی پشت پناہی کی ضرورت ہوگی۔

یہ بھی پڑھیں : غزہ پیس بورڈ نے امن کیلئے عالمی فورس کی تعیناتی، شرم الشیخ معاہدہ اور حماس کا ایفائے عہد لازمی قرار دے دیا

انہوں نے اس بات پر افسوس کا اظہار بھی کیا کہ ہمسایہ ملک مصر نے غزہ سے بے دخل کیے جانے والے فلسطینیوں کو اپنے ملک میں پناہ دینے اور سنبھالنے سے صاف انکار کر دیا ہے۔

واضح رہے کہ ڈونلڈ ٹرمپ نے بھی ماضی میں غزہ سے فلسطینیوں کی مکمل بے دخلی اور اس علاقے پر امریکی یا اسرائیلی کنٹرول کی حمایت کی تھی، تاہم بعد میں انہوں نے ایک نام نہاد جنگ بندی معاہدے کی سرپرستی کی، جس میں کہا گیا تھا کہ کسی کو غزہ چھوڑنے پر مجبور نہیں کیا جائے گا۔

فلسطینیوں کی نسل کشی اور حقوق کے لیے کام کرنے والی عالمی تنظیموں اور انسانی حقوق کے حقوق العباد کے فعال کارکنوں نے اسرائیلی حکومت کی ان تجاویز پر شدید غصے کا اظہار کیا ہے۔

انسانی حقوق کے رہنماؤں کا کہنا ہے کہ غزہ کی پوری آبادی کو وہاں سے زبردستی نکالنے کا یہ منصوبہ عالمی قوانین کے تحت خالصتاً نسلی کشی کے زمرے میں آتا ہے۔

انسانی حقوق کے اداروں کا کہنا ہے کہ اسرائیل جنگی مظالم کے ذریعے فلسطینیوں کو ان کی اپنی سرزمین سے محروم کرنے کی کوشش کر رہا ہے، جس کی اجازت نہیں دی جا سکتی۔