ویزا پابندیاں ایرانی فٹ بال ٹیم کی ناکامی کی بڑی وجہ بن گئیں، الجزائر اور آسٹریا پر میچ فکسنگ کا الزام

ایران کی قومی فٹ بال ٹیم فیفا ورلڈ کپ 2026 کے اگلے مرحلے میں پہنچنے میں ناکام ہو گئی، جس کے بعد ایران کے اندر اور باہر عوامی سطح پر مایوسی ہے۔

ایران کی قومی فٹ بال ٹیم ایک بار پھر ورلڈ کپ کے ناک آؤٹ مرحلے تک پہنچنے کا خواب پورا کرنے میں ناکام رہی ہے، اور اس اخراج نے ایرانی عوام میں مختلف نوعیت کے جذبات کو بیدار کر دیا ہے۔

امریکی شہر سیئٹل میں مصر کے خلاف کھیلا گیا میچ 1-1 سے برابر ہونے کے بعد ایرانی ٹیم گروپ جی میں صرف 3 پوائنٹس کے ساتھ تیسرے نمبر پر رہی۔

فیفا کی جانب سے ٹیموں کی تعداد 32 سے بڑھا کر 48 کرنے کے باوجود ایرانی ٹیم اگلے مرحلے میں جانے والی بہترین تیسری پوزیشن کی 8 ٹیموں میں شامل ہونے سے محض ایک درجے کے فرق سے رہ گئی۔

میچ کے 93 ویں منٹ میں شجاع خلیل زادہ نے گول کر کے ٹیم کو برتری دلائی تھی، لیکن ویڈیو اسسٹنٹ ریفری (وی اے آر) نے فاؤل یا آف سائیڈ کی وجہ سے اسے مسترد کر دیا۔ اس گول کی خوشی منانے کے دوران ایرانی کوچنگ اسٹاف کے ایک رکن کی ناک کی ہڈی بھی ٹوٹ گئی۔

یہ بھی پڑھیں : کینیڈا نے جنوبی افریقہ کو ہرا کر پہلی بار ورلڈ کپ کے راؤنڈ آف 16 میں جگہ بنا لی

ہیڈ کوچ امیر قلعہ نوئی نے سرکاری ٹیلی ویژن پر مایوسی کا اظہار کرتے ہوئے کہا کہ ایسا لگتا ہے، جیسے قسمت ہمارے ساتھ بلکل نہیں تھی، کیونکہ پورے ٹورنامنٹ میں ایران کے 3 گول ریفری نے مسترد کیے۔

انہوں نے کھلاڑیوں کو ملنے والے سخت حالات اور سفری پابندیوں کو بھی ناکامی کی وجہ قرار دیا کیونکہ میزبان ملک امریکہ کے ساتھ ایران کی پچھلے 4 ماہ سے جنگ جاری ہے۔

ایران کے فٹ بال حکام اور میڈیا کو امریکہ نے ویزے دینے سے انکار کر دیا تھا، جس کی وجہ سے ٹیم کو میکسیکو کے بارڈر پر رکنا پڑا اور وہ میچ سے صرف 24 گھنٹے پہلے امریکہ میں داخل ہو سکتے تھے۔

ایران کے اخراج پر سرکاری ٹی وی نے دوسری ٹیموں پر میچ فکسنگ کا الزام بھی لگایا۔ الجزائر اور آسٹریا کا میچ 3-3 سے برابر رہنے پر دونوں ٹیمیں اگلے مرحلے میں پہنچ گئیں، جس سے ایران باہر ہو گیا۔

اس میچ کے دوران ایرانی مبصرین نے الجزائر کے کھلاڑیوں سے مسلمان بھائی ہونے کے ناطے جیتنے کی اپیلیں بھی کیں لیکن میچ برابر ہو گیا۔