مارٹینیلی کے آخری منٹ کے گول نے برازیل کو جاپان کے خلاف سنسنی خیز فتح دلا دی

فٹبال ورلڈ کپ کے راؤنڈ آف 32 کے سنسنی خیز مقابلے میں برازیل نے میچ کے آخری لمحات میں گول کر کے جاپان کو 2-1 سے شکست دے کر راؤنڈ آف 16 میں جگہ بنا لی۔

امریکی شہر ہیوسٹن میں کھیلے گئے ورلڈ کپ کے راؤنڈ آف 32 کے ایک اہم میچ میں 5 مرتبہ کی عالمی چیمپئن برازیل نے جاپان کو 2-1 سے ہرا دیا ہے۔

میچ کے دوسرے ہاف میں متبادل کھلاڑی کے طور پر آنے والے گیبریل مارٹینیلی نے انجری ٹائم کے چھٹے منٹ میں فیصلہ کن گول اسکور کیا، جب یہ میچ ایکسٹرا ٹائم کی طرف بڑھتا ہوا معلوم ہو رہا تھا۔

اس فتح کے بعد اب برازیل کا اگلا مقابلہ اتوار کے روز نیو جرسی میں راؤنڈ آف 16 کے میچ میں آئیوری کوسٹ یا ناروے سے ہوگا۔

میچ کے 29 ویں منٹ میں جاپان کے کاشو سانو نے مڈفیلڈ سے ایک غلط پاس کا فائدہ اٹھاتے ہوئے گول کر کے اپنی ٹیم کو پہلے برتری دلائی تھی۔

تاہم میچ کے 56 ویں منٹ میں برازیل کے کاسیمیرو نے گیبریل میگالائس کے اسسٹ پر شاندار ہیڈر کے ذریعے اسکور 1-1 سے برابر کر دیا۔

یہ بھی پڑھیں : ورلڈ کپ سے شرمناک اخراج، سعودی فٹبال فیڈریشن کے صدر نے استعفیٰ دے دیا

برازیل کے اسٹار وینیسیئس جونیئر، جو اب تک ٹورنامنٹ میں 4 گول کر چکے ہیں، کو 58 ویں منٹ میں برتری دلانے کا موقع ملا لیکن جاپانی گول کیپر زیون سوزوکی نے ان کا شاٹ روک دیا۔

جاپان کی ٹیم ورلڈ کپ کی تاریخ میں کبھی کوئی ناک آؤٹ میچ جیتنے میں کامیاب نہیں ہو سکی ہے۔ جاپان کے خلاف 15 میچوں میں برازیل کی یہ 12 ویں فتح تھی، جبکہ 2 میچ ڈرا ہوئے ہیں۔

دلچسپ بات یہ ہے کہ برازیل اور جاپان کے درمیان گہرے تعلقات ہیں اور برازیل میں تقریباً 27 لاکھ جاپانی نژاد لوگ رہتے ہیں، جو جاپان سے باہر سب سے بڑی جاپانی آبادی ہے۔

یہ تعلقات فٹبال تک پھیلے ہوئے ہیں، جہاں برازیل کے سپر اسٹار زیکو 1991 میں جاپانی کلب کاشیما اینٹلرز کے لیے کھیلنے جاپان گئے تھے اور انہوں نے 2002 سے 2006 تک جاپانی قومی ٹیم کی کوچنگ بھی کی تھی۔

برازیل نے یہ میچ اپنی پہلی ورلڈ کپ چیمپئن شپ کی سالگرہ کے دن جیتا ہے، جب 1958 میں 17 سالہ پیلے نے سوئیڈن کے خلاف فائنل میں 2 گول کیے تھے۔ جاپان کی اس شکست کے ساتھ ہی ستمبر سے جاری اس کی 10 میچوں کی ناقابل شکست مہم کا خاتمہ ہو گیا ہے۔