میکسیکو نے ایکواڈور کو 2-0 سے ہرا کر 40 سالہ پرانی بدقسمتی کا سلسلہ ختم کر دیا

میکسیکو نے فٹ بال ورلڈ کپ کے اہم میچ میں ایکواڈور کو 2-0 سے شکست دے کر 40 سال بعد ناک آؤٹ مرحلے کی بدقسمتی کو ختم کر دیا۔

میکسیکو نے اپنے تاریخی ازٹیکا اسٹیڈیم میں شاندار کھیل کا مظاہرہ کرتے ہوئے ایکواڈور کو 2-0 سے ہرا کر فٹ بال ورلڈ کپ کے آخری 16 ٹیموں کے مرحلے میں جگہ بنا لی ہے۔

طوفانی موسم کی وجہ سے یہ میچ ایک گھنٹے کی تاخیر سے شروع ہوا۔ میچ کا آغاز ہوتے ہی میزبان ٹیم نے جارحانہ کھیل پیش کیا۔

کھیل کے 22 ویں منٹ میں جولیان کوئینونز نے رابرٹو الواراڈو سے بال حاصل کر کے بائیں جانب سے شاندار دوڑ لگائی اور ایک زوردار شاٹ کے ذریعے گول کر کے میکسیکو کو برتری دلا دی۔

یہ بھی پڑھیں : فرانس نے سویڈن کو 3-0 سے ہرا کر ورلڈ کپ کے آخری 16 میں جگہ بنا لی

اس کے بعد کھیل کے 30 ویں منٹ میں جولیان کوئینونز کے خوبصورت پاس پر رائل جمینیز نے دوسرا گول داغ کر اسٹیڈیم میں موجود شائقین کو جھومنے پر مجبور کر دیا۔

میکسیکو نے اس سے قبل آخری بار 1986 میں ورلڈ کپ کا ناک آؤٹ میچ جیتا تھا، جب اس نے خود ٹورنامنٹ کی میزبانی کی تھی۔ اس فتح کے بعد میکسیکو ازٹیکا اسٹیڈیم میں کھیلے گئے اپنے گزشتہ 10 ورلڈ کپ میچوں میں ناقابلِ شکست رہا ہے۔

میکسیکو کے 17 سالہ کھلاڑی گلبرٹو مورا کو فائنل الیون میں شامل کیا گیا، جس کے بعد وہ ورلڈ کپ کی تاریخ میں ناک آؤٹ میچ شروع کرنے والے برازیل کے لیجنڈ پیلے (1958) کے بعد دوسرے سب سے کم عمر ترین کھلاڑی بن گئے ہیں۔

اب اگلے مرحلے میں میکسیکو کا مقابلہ انگلینڈ یا جمہوریہ کانگو سے اتوار کے روز اسی اسٹیڈیم میں ہوگا۔