مراکش، کینیڈا کو شکست دے کر دوسری بار کوارٹر فائنل میں پہنچنے والی پہلی افریقی ٹیم بن گئی

مراکش نے فیفا ورلڈ کپ کے ناک آؤٹ مرحلے میں کینیڈا کو 3-0 سے شکست دے کر دوسری بار کوارٹر فائنل میں پہنچنے والی پہلی افریقی ٹیم بننے کا اعزاز حاصل کر لیا۔

امریکہ کے شہر بوسٹن میں کھیلے گئے ورلڈ کپ کے راؤنڈ آف 16 کے مقابلے میں مراکش نے کینیڈا کو 3-0 سے عبرتناک شکست دے دی ہے۔

اس شاندار جیت کے بعد مراکش کی ٹیم ورلڈ کپ کے کوارٹر فائنل میں پہنچ گئی ہے اور وہ ایک سے زیادہ مرتبہ ورلڈ کپ کے آخری 8 میں جگہ بنانے والی تاریخ کی پہلی افریقی ٹیم بن گئی ہے۔

مراکش کی ٹیم اس سے قبل 2022 کے ورلڈ کپ میں سیمی فائنل تک پہنچی تھی۔ کینیڈا کی ٹیم نے میچ کے آغاز میں بہترین کھیل پیش کیا اور بال پر اپنا کنٹرول برقرار رکھا لیکن دونوں ٹیمیں پہلے ہاف میں کوئی گول نہ کر سکیں۔

میچ کے 50ویں منٹ میں مراکش کے اسٹار کھلاڑی عزالدین اوناحی نے اشرف حکیمی کے فری کک پاس پر ڈی باکس کے باہر سے شاندار شاٹ مار کر پہلا گول کیا۔

یہ بھی پڑھیں : انگلینڈ خواتین ٹیم ٹی 20 ورلڈ کپ کے فائنل میں داخل، جنوبی افریقہ کو 40 رنز سے شکست

میچ کے 82ویں منٹ میں مراکش نے کینیڈا کے حملے پر جوابی کارروائی کی اور براہیم دیاز کے بہترین پاس پر عزالدین اوناحی نے اپنا دوسرا اور ٹیم کا دوسرا گول اسکور کیا۔

میچ کے آخری منٹ میں سفیان رحیمی نے، جو 22ویں منٹ میں زخمی کھلاڑی اسماعیل صیباری کی جگہ میدان میں آئے تھے، تیسرا گول کر کے کینیڈا کی شکست پر مہر لگا دی۔

کینیڈا کی اس ہار کے ساتھ ہی ورلڈ کپ کے میزبان ملک کا تاریخی سفر ختم ہو گیا، جس نے پہلی بار جنوبی افریقہ کو 1-0 سے ہرا کر ناک آؤٹ مرحلے کے لیے کوالیفائی کیا تھا۔

فیفا رینکنگ میں چھٹے نمبر پر موجود مراکش کی ٹیم اب جمعرات کے روز بوسٹن میں فرانس کے خلاف کوارٹر فائنل میچ کھیلے گی۔

میچ کے دوران دونوں ٹیموں کے کھلاڑیوں کے درمیان سخت جسمانی ٹکراؤ دیکھا گیا اور ریفری نے دونوں ٹیموں کو 4، 4 یلو کارڈ دکھائے۔ کینیڈا میں پیدا ہونے والے مراکشی گول کیپر یاسین بونو نے 3 شاندار گول بچا کر اپنی ٹیم کی جیت میں اہم کردار ادا کیا۔