منشیات صرف بہانہ ہے، ٹرمپ کا اصل ہدف وینزویلا کا تیل ہے: اسرائیلی میڈیا

نیویارک: صیہونی میڈیا نے رپورٹ کیا ہے کہ امریکی صدر کے وینزویلا میں منشیات کی اسمگلنگ کے خلاف اقدامات کے دعوے دراصل واشنگٹن کے حقیقی مقاصد کو چھپانے کے لیے کیے گئے ہیں۔

میڈیا نے کہا ہے کہ امریکا غیر حقیقی دعوے کر کے اس خطے میں اپنی طاقت اور بالادستی کو مضبوط کرنے کی کوشش کر رہا ہے، جسے وہ اپنی "اسٹریٹجک بالکونی” تصور کرتا ہے۔

امریکی صدر نے دعویٰ کیا کہ وینزویلا سے منشیات کی اسمگلنگ کی وجہ سے سالانہ تقریباً تین لاکھ امریکی متاثر ہوتے ہیں اور وہ اس رجحان کو ختم کرنے کے لیے پرعزم ہیں۔ تاہم اسرائیلی ماہرین کا کہنا ہے کہ یہ اعداد و شمار مبالغہ آرائی پر مبنی ہیں اور حقیقت میں متاثرین کی تعداد کہیں کم ہے۔

اسرائیلی میڈیا کے مطابق وینزویلا میں سعودی عرب کے بعد دنیا کے سب سے بڑے تیل کے ذخائر موجود ہیں، اور یہی وجہ ہے کہ واشنگٹن کے اقدامات میں فوجی دباؤ ڈالنے اور صدر نکولس مادورو کے خلاف کارروائی کی اہمیت شامل ہے۔

رپورٹ میں کہا گیا ہے کہ امریکی سرگرمیوں کا اصل مقصد منشیات نہیں بلکہ تیل ہے اور منشیات کے خلاف بیانیہ صرف عالمی اور مقامی سطح پر اقدامات کو جائز ثابت کرنے کا ایک طریقہ ہے۔