ایرانی انجینئرنگ کا شاہکار، امریکی اور اسرائیلی حملوں میں تباہ ہونے والے چھ ریلوے پل 72 گھنٹوں میں بحال

ایران نے امریکی اور اسرائیلی فضائی حملوں میں تباہ ہونے والے اپنے چھ اہم ریلوے پلوں کو محض 72 گھنٹوں کے اندر دوبارہ بحال کر کے دنیا کو حیران کر دیا ہے۔

ایران کے اہم ریلوے کوریڈورز تہران – تبریز اور تہران – مشہد پر ہونے والے حملوں کے بعد ایرانی انجینئرز نے فوری کارروائی کرتے ہوئے تباہ شدہ حصوں کو ریکارڈ وقت میں تبدیل کر دیا ہے۔

تہران – تبریز لائن سالانہ 70 لاکھ ٹن سامان کی ترسیل کرتی ہے اور ایران کو ترکی سے جوڑتی ہے، جبکہ تہران – مشہد لائن پر سالانہ ڈیڑھ کروڑ مسافر سفر کرتے ہیں۔

زنجان، بوستان آباد، شاہرود اور نیشاپور کے قریب واقع ان پلوں کی لمبائی 20 سے 45 میٹر کے درمیان تھی، جنہیں میزائل حملوں سے شدید نقصان پہنچا تھا۔

یہ بھی پڑھیں : آبنائے ہرمز پر قبضے کی نئی حکمت عملی، ایران کا عالمی تجارتی گزرگاہ کو معاشی طاقت میں بدلنے کا منصوبہ

ایران کی دفاعی انجینئرنگ نے اس صورتحال سے نمٹنے کے لیے پہلے ہی ہر پل کے قریب پانچ سو میٹر کے فاصلے پر کنکریٹ اور دھات سے بنے متبادل حصے تیار کر کے رکھے ہوئے تھے۔

جیسے ہی حملہ ہوا، ایرانی ٹیموں نے بھاری کرینوں کی مدد سے تباہ شدہ حصوں کو نکالا اور پہلے سے تیار شدہ نئے حصوں کو ان کی جگہ نصب کر دیا۔

یہ کنکریٹ گڈرز 40 سے 80 ٹن وزنی تھے، جنہیں نصب کرنے کے بعد ٹریفک کو فوری طور پر بحال کر دیا گیا۔

یہ ایک باقاعدہ دفاعی حکمت عملی ہے، جس میں پہلے سے پرزے تیار رکھنا اور انہیں استعمال کی جگہ کے قریب رکھنا شامل ہے۔

اس حکمت عملی کی وجہ سے دشمن کے حملے کا اثر صرف 72 گھنٹوں تک محدود رہ جاتا ہے، ورنہ ان پلوں کی دوبارہ تعمیر میں مہینوں لگ سکتے تھے۔

اب عالمی سطح پر فوجی منصوبہ ساز اس بات پر غور کر رہے ہیں کہ اگر دشمن کے پاس ایسی صلاحیت موجود ہو تو بمباری کے ذریعے سپلائی لائنیں کاٹنا کتنا مشکل ہو سکتا ہے۔