ایران کی فضائیہ نے مقامی طور پر تیارکردہ طیارے سے امریکی تنصیبات کو نشانہ بنایا، رپورٹ

رپورٹ میں انکشاف کیا گیا ہے کہ ایران کے مقامی طور پر تیار کردہ کوثر طیارے نے کویت میں امریکی فوجی اڈے کو نشانہ بنا کر کوریائی جنگ کے بعد کی تاریخ رقم کر دی ہے، جس نے امریکی پیٹریاٹ میزائل سسٹم کو بھی چکمہ دے دیا۔

پریس ٹی وی کی ایک حالیہ رپورٹ میں انکشاف کیا گیا ہے کہ ایران کے مقامی طور پر تیار کردہ کوثر طیارے (جو کہ ایف 5 کا ایک جدید ورژن ہے) نے کویت میں قائم امریکی فوجی اڈے کیمپ بیوہرنگ کو انتہائی کامیابی سے نشانہ بنایا ہے۔

یہ کوریائی جنگ کے بعد پہلی بار ہوا ہے کہ کسی فکسڈ ونگ طیارے نے جنگی حالات کے دوران کسی بڑی امریکی فوجی تنصیب پر کامیاب حملہ کیا ہو۔

یہ بھی پڑھیں : نیٹو نے جرمنی سے امریکی فوجیوں کے انخلا کے اعلان پر واشنگٹن سے وضاحت طلب کر لی

رپورٹ کے مطابق یہ طیارہ جنوب مغربی ایران کے ایک فوجی اڈے سے اڑا اور پائلٹ نے اسے زمین سے صرف چند درجن میٹر کی بلندی پر اڑایا تاکہ امریکی پیٹریاٹ بیٹریوں کے ریڈار اس کی شناخت نہ کر سکیں۔

اس مشن کے لیے کسی اضافی فیول ٹینک کا استعمال نہیں کیا گیا تاکہ طیارہ ہلکا رہے اور وہ اپنے ساتھ 3000 کلو گرام تک کا بارود لے جا سکے۔ حملے کے دوران 250 سے 500 کلو گرام کے غیر گائیڈڈ بموں کا استعمال کیا گیا۔

رپورٹ میں بتایا گیا ہے کہ ایرانی پائلٹ کو مکمل یقین تھا کہ امریکی اواکس طیارے اس کی اڑان کو محسوس کر لیں گے، لیکن اسے یہ بھی معلوم تھا کہ اس مخصوص زون میں امریکی انٹرسیپٹر طیارے گشت نہیں کر رہے ہوں گے۔

یہ حملہ ایران کے دیگر جوابی حملوں بشمول بیلسٹک میزائلوں اور ڈرونز کے ساتھ مل کر کیا گیا تاکہ امریکی دفاعی نظام میں الجھن پیدا کی جا سکے۔

کوثر طیارہ جدید ڈیجیٹل کاک پٹ، ملٹی پرپز فائر کنٹرول ریڈار اور ایرانی ٹربوجیٹ انجن سے لیس ہے، جس نے اپنی افادیت ثابت کر دی ہے۔