آبنائے ہرمز کی حفاظت کیلئے اقوام متحدہ میں قرارداد کا مسودہ تیار

امریکہ اور اس کے اتحادی خلیجی ممالک نے آبنائے ہرمز میں بحری جہازوں کی محفوظ آمد و رفت کو یقینی بنانے کے لیے اقوام متحدہ میں ایک قرارداد کا مسودہ تیار کر لیا ہے۔

امریکی وزیر خارجہ مارکو روبیو کے مطابق، امریکہ نے بحرین، سعودی عرب، متحدہ عرب امارات، کویت اور قطر کے ساتھ مل کر ایک مشترکہ قرارداد تیار کی ہے، جس کا مقصد آبنائے ہرمز میں عالمی جہاز رانی کو دوبارہ محفوظ بنانا ہے۔

قرارداد میں ایران سے مطالبہ کیا گیا ہے کہ وہ بحری جہازوں پر حملے بند کرے، سمندر میں بارودی سرنگیں بچھانے سے باز رہے اور گزرنے والے جہازوں سے وصول کی جانے والی غیر قانونی فیس کا خاتمہ کرے۔

یہ بھی پڑھیں : آبنائے ہرمز میں امریکہ اور ایرانی فورسز کے درمیان جھڑپیں، میزائلوں اور ڈرونز کا استعمال

مارکو روبیو نے سخت الفاظ میں کہا کہ اسلامی جمہوریہ ایران عالمی معیشت کو یرغمال بنا رہا ہے، جس کی اب مزید اجازت نہیں دی جا سکتی۔

اس قرارداد میں ایک انسانی ہمدردی کی راہداری قائم کرنے کا بھی ذکر کیا گیا ہے۔ ذرائع کے مطابق، مسودے کے ابتدائی متن میں کچھ تبدیلیاں کی گئی ہیں تاکہ روس اور چین کی حمایت حاصل کی جا سکے اور ویٹو کے خطرے کو کم کیا جا سکے۔

امریکہ نے ایران پر زور دیا ہے کہ وہ آبنائے ہرمز میں بچھائی گئی بارودی سرنگوں کی نشاندہی کرے اور انہیں ہٹانے میں عالمی برادری کی مدد کرے۔

خلیجی ممالک کی اس قرارداد میں شمولیت ظاہر کرتی ہے کہ خطے کے ممالک ایران کے بڑھتے ہوئے اثر و رسوخ اور بحری گزرگاہوں کی بندش سے شدید نالاں ہیں۔