شہید علی خامنہ ای کی آخری رسومات، نجف اور کربلا میں سرکاری چھٹی کا اعلان کردیا گیا

شہید علی خامنہ ای کی آخری رسومات کے لیے عراقی صوبوں میں بدھ اور جمعرات کو چھٹی کا اعلان کردیا گیا ہے، جبکہ نجف اور کربلا میں سیکیورٹی ہائی الرٹ ہے۔

ایران کے شہید رہبر اعلیٰ آیت اللہ علی خامنہ ای کی آخری رسومات میں عراق کا کردار انتہائی اہمیت اختیار کر گیا ہے، جو شیعہ مقدس شہروں میں ایک روحانی سفر اور دنیا بھر کی شیعہ برادریوں کے لیے اتحاد کا ایک بڑا پیغام بن کر ابھر رہا ہے۔

عراق کے متعدد صوبوں نے بدھ اور کچھ مقامات پر جمعرات کو سرکاری تعطیل کا باقاعدہ اعلان کر دیا ہے تاکہ لاکھوں سوگوار آخری رسومات اور جنازے کے جلوسوں میں شرکت کے لیے نجف اشرف اور کربلا معلیٰ کے مقدس شہروں کا سفر آسانی سے کر سکیں۔

یہ بھی پڑھیں : امریکہ اور اسرائیل نے فلسطین کی آزادی کی حمایت پر علی خامنہ ای کو شہید کیا، حوثی ترجمان

مقررہ شیڈول کے مطابق، یہ مذہبی تقاریب منگل کے روز ایران کے شہر قم میں، بدھ کو عراق کے شہروں نجف اور کربلا میں، اور جمعرات کو شہید علی خامنہ ای کے آبائی شہر مشہد مقدس میں منعقد کی جائیں گی، جنہیں شیعہ مسلمانوں کے سب سے بڑے روحانی مراکز تسلیم کیا جاتا ہے۔

عراقی حکام اور عوامی رضاکار فورس (الحشد الشعبی) نے نجف اور کربلا میں متوقع لاکھوں شہریوں کی آمد کے لیے لاجسٹک اور سیکیورٹی انتظامات کو انتہائی سخت کر دیا ہے۔

سرکاری بیانات میں بتایا گیا ہے کہ عسکری کمانڈروں نے اہم ملاقاتیں کر کے تنظیمی منصوبوں کو حتمی شکل دے دی ہے، جس میں تمام حصہ لینے والے یونٹوں کے درمیان فرائض کی تقسیم، سیکیورٹی اور زائرین کے لیے سروسز کے انتظامات شامل ہیں۔