امریکہ اور ایران تنازع کا منصفانہ حل نکالا جائے، عالمی معیشت متاثر ہو رہی ہے، روس

روسی وزیر خارجہ نے کہا ہے کہ عالمی معیشت کو بچانے کے لیے امریکہ اور ایران کے تنازع کا ایک منصفانہ اور پائیدار حل تلاش کرنا ناگزیر ہو چکا ہے۔

روسی وزیر خارجہ سرگئی لاوروف نے واشنگٹن اور تہران کے درمیان جاری شدید کشیدگی پر تشویش کا اظہار کرتے ہوئے کہا ہے کہ امریکہ اور ایران کے تنازع کا منصفانہ حل تلاش کرنا انتہائی ضروری ہے۔

انہوں نے زور دیا کہ دونوں ممالک کے درمیان کوئی بھی نیا معاہدہ ایسا ہونا چاہیے، جو تمام متعلقہ ممالک کے مفادات اور حقوق کا عکاس ہو، بصورتِ دیگر خطے میں امن قائم نہیں ہو سکتا۔

یہ بھی پڑھیں : ایک دوسرے پر حملوں کے باوجود امریکہ اور ایران میں ایٹمی مذاکرات جاری

روسی وزیر خارجہ کا کہنا تھا کہ اس موجودہ کشیدگی اور لڑائی کے برے اثرات اب صرف مشرقِ وسطیٰ تک محدود نہیں رہے بلکہ اس کی وجہ سے پوری عالمی معیشت شدید دباؤ کا شکار ہو رہی ہے۔

سرگئی لاوروف نے مزید واضح کیا کہ آبنائے ہرمز اور خلیج فارس کے حساس سمندری راستوں پر روس کا مؤقف صاف اور واضح ہے اور ماسکو وہاں جہاز رانی کی آزادی کا حامی ہے۔

انہوں نے کہا کہ کوئی بھی معاہدہ اسی وقت کامیاب اور دیرپا ہو سکتا ہے، جب اس میں تمام فریقوں کے مفادات اور ان کے سیکیورٹی خدشات کو یکساں طور پر مدِ نظر رکھا جائے۔

روس کا ماننا ہے کہ طاقت کے استعمال کے بجائے مذاکرات کے ذریعے ہی اس بحران سے نکلا جا سکتا ہے۔