امریکہ کے ایران کے خلاف مسلسل دسویں رات بھی فضائی حملے جاری، مختلف شہروں میں دھماکے

امریکہ نے ایران پر مسلسل دسویں رات بھی شدید ہوائی حملے کیے، جنوب میں واقع بندر عباس، قشم جزیرہ، بندر لنگہ، سیریک سمیت مختلف شہروں میں دھماکے سنے گئے۔

امریکی فوج نے ایران کے خلاف اپنے حملوں کا نیا سلسلہ جاری رکھتے ہوئے مسلسل دسویں رات بھی ملک کے مختلف علاقوں پر بمباری کی ہے۔

امریکی سینٹرل کمانڈ کے مطابق یہ حملے ان کمانڈر ان چیف کی ہدایت پر کیے گئے جن کا مقصد آبنائے ہرمز میں تجارتی جہاز رانی پر حملے کرنے والی ایرانی فوجی صلاحیتوں کو کم کرنا ہے۔

امریکی فوج نے دعویٰ کیا ہے کہ تازہ ترین لہر میں ایرانی ملٹری کمانڈ سینٹرز، بحری صلاحیتوں، میزائل اور ڈرون لانچ سائٹس اور ایئر ڈیفنس سسٹمز کو کامیا بی سے نشانہ بنایا گیا ہے۔

یہ بھی پڑھیں : کویت کا ایران کے خلاف سخت سفارتی مؤقف اپنانے کا فیصلہ

ایرانی سرکاری میڈیا اور ذرائع کے مطابق جنوب اور مغرب کے متعدد شہروں میں شدید دھماکوں کی آوازیں سنی گئی ہیں۔ جنوب میں واقع بندر عباس، قشم جزیرہ، بندر لنگہ، سیریک، چابہار، کنارک اور شیراز میں حملوں کی اطلاعات ملی ہیں۔

ایلام صوبے کے شہر آبدانان میں دینار کوہ کے علاقے میں ایک تنصیب کو نشانہ بنایا گیا جس پر مقامی گورنر نے بتایا کہ کوئی جانی نقصان نہیں ہوا۔

بوشہر نیوکلیئر پاور پلانٹ کے قریب ایران کا فضائی دفاعی نظام فعال ہو گیا اور اس نے آنے والے میزائلوں کو نشانہ بنایا، تاہم بوشہر کے گورنر نے واضح کیا کہ شہر پر کوئی بلا واسطہ حملہ نہیں ہوا۔ اصفہان صوبے کی انتظامیہ نے اصفہان شہر پر کسی قسم کے حملے یا دھماکوں کی تردید کی ہے۔