پڑوسی ممالک سے سیکیورٹی اور معاشی تعاون کے پیغامات موصول ہو رہے ہیں، باقر قالیباف

ایرانی پارلیمنٹ کے اسپیکر نے انکشاف کیا ہے کہ انہیں پڑوسی ممالک سے سیکیورٹی کے نئے انتظامات اور معاشی تعاون سے متعلق متعدد پیغامات موصول ہوئے ہیں۔

ایرانی پارلیمنٹ کے اسپیکر باقر قالیباف نے بتایا ہے کہ خطے کے پڑوسی ممالک کی جانب سے نئے سیکیورٹی نظام اور معاشی تعاون کی تشکیل سے متعلق اہم پیغامات ان تک پہنچائے گئے ہیں۔

انہوں نے موجودہ صورتحال پر بات کرتے ہوئے کہا کہ امریکی دھونس اور جابرانہ پالیسیوں نے اس کے اپنے تمام اتحادی ممالک کی سلامتی کو بھی شدید خطرے میں ڈال دیا ہے۔

یہ بھی پڑھیں : تہران کیخلاف کسی بھی غلط فہمی کا جواب تباہ کن اور دردناک ہو گا، ایرانی چیف آف اسٹاف

باقر قالیباف کا مزید کہنا تھا کہ امریکا نے اسرائیل کی بے جا حمایت اور پاسداری کے چکر میں اپنے اتحادی ممالک کے معاشی اور سیکیورٹی مفادات کو نظر انداز کر دیا ہے۔

ان کا کہنا تھا کہ اس صورتحال کے باعث امریکی اقدامات کی وجہ سے اب اس کے اتحادی ممالک بھی اپنی بقا کو خطرے میں محسوس کرنے لگے ہیں۔

انہوں نے اس بات پر زور دیا کہ مشرق وسطیٰ اور خطے میں بیرونی مداخلیت کے بغیر آزادانہ طور پر تشکیل دیا گیا سیکیورٹی نظام ہی حقیقی اور پائیدار امن کی ضمانت دے سکتا ہے۔