امریکہ کا ایرانی جزیرے لارک پر فضائی حملہ کرکے سی مائنز بچھانے کی کوشش ناکام بنانے کا دعویٰ

امریکی سینٹرل کمانڈ نے آبنائے ہرمز میں ایران کے جزیرے خارگ کے بعد لارک جزیرے پر واقع دو راکٹ لانچرز کو نشانہ بنا کر تباہ کرنے کا دعویٰ کیا ہے۔

امریکی سینٹرل کمانڈ (سینٹکام) کے ترجمان کیپٹن ٹم ہاکنز کے مطابق امریکی افواج نے پیر کے روز ایران کے جنوبی ساحلی جزیرے لارک جزیرے پر موجود دو ایرانی راکٹ لانچرز پر محدود  بمباری کی ہے۔

امریکی ملٹری کے مطابق یہ اقدام اس وقت اٹھایا گیا، جب ایرانی پاسدارانِ انقلاب کے دستوں کو آبنائے ہرمز کی عالمی بحری راہداری میں راکٹوں کے ذریعے سمندری بارودی سرنگیں (سی مائنز) بچھانے کی تیاریاں کرتے دیکھا گیا تھا۔

یہ بھی پڑھیں : ایران اگر ایٹمی طاقت بن جاتا تو مشرقِ وسطیٰ اور اسرائیل تباہ ہو جاتے، امریکی صدر

سینٹکام نے مؤقف اختیار کیا ہے کہ یہ کارروائی تجارتی جہاز رانی، عام بحری عملے اور عالمی تجارت کے آزادانہ بہاؤ کو درپیش فوری خطرے کا خاتمہ کرنے کے لیے کی گئی ہے۔

دوسری جانب ایرانی سرکاری میڈیا نے لارک جزیرے کے قریب شدید دھماکوں کی تصدیق کی ہے۔ رپورٹ کے مطابق امریکی حملے کے نتیجے میں پاسدارانِ انقلاب کے اہلکاروں اور عام شہریوں کی شہادتیں اور زخمی ہونے کی اطلاعات ہیں۔