کرنسی نوٹوں کو عام طور پر کاغذ سمجھا جاتا ہے، مگر حقیقت اس کے برعکس

دنیا بھر میں کرنسی نوٹوں کو عام طور پر کاغذ سمجھا جاتا ہے، لیکن حقیقت اس سے کافی مختلف ہے۔

 ماہرین اور مالیاتی اداروں کے مطابق یہ نوٹ عام کاغذ سے نہیں بلکہ خاص قسم کے مضبوط ریشوں سے تیار کیے جاتے ہیں، تاکہ یہ زیادہ دیر تک استعمال ہو سکیں۔

رپورٹس کے مطابق کئی ممالک میں کرنسی نوٹوں کی تیاری کے لیے کپاس کے باریک ریشے استعمال کیے جاتے ہیں، جنہیں “کاٹن لنٹرز” کہا جاتا ہے۔

 مثال کے طور پر ریزرو بینک آف انڈیا کے مطابق ان کے نوٹ مکمل طور پر کپاس کے فائبر سے تیار کیے جاتے ہیں، جبکہ عام کاغذ لکڑی کے گودے سے بنایا جاتا ہے۔

اسی فرق کی وجہ سے کرنسی نوٹ عام کاغذ کی نسبت زیادہ مضبوط اور پائیدار ہوتے ہیں۔ نئے نوٹ شروع میں سخت محسوس ہوتے ہیں، لیکن استعمال کے بعد نرم ہو جاتے ہیں، پھر بھی اپنی مضبوطی برقرار رکھتے ہیں۔ اس کے برعکس عام کاغذ جلد پھٹ جاتا ہے یا خراب ہو جاتا ہے۔

کچھ بین الاقوامی رپورٹس کے مطابق بعض ممالک میں کرنسی نوٹوں میں کپاس کے ساتھ لینن (سن) کے ریشے بھی شامل کیے جاتے ہیں، تاکہ ان کی پائیداری مزید بہتر ہو سکے۔ اس کے علاوہ نوٹوں کو مضبوط بنانے کے لیے خاص قسم کے کیمیکل اور چپکنے والے مواد بھی استعمال کیے جاتے ہیں۔